காதலியைத் தேடி கலிபோர்னியாவுக்கு லிப்ட் கேட்டே பயணிக்கும் ஓர் இளைஞன், வழியில் ஒரு பெண்ணுக்கு லிப்ட் கொடுத்து விதியின் விளையாட்டில் சிக்கிக் கொள்வதே ‘டிடூர்’ (DETOUR -1945) படத்தின் ஒருவரிக் கதை.
அல் ராபர்ட்ஸ் என்ற ஏழை இளைஞன் சாலையில் சோர்வாக நடந்து வருகிறான். சாலையோர உணவகம் ஒன்றில் அமர்ந்து அவன் காபி குடிக்கும்போது, அங்கே ஒலிக்கும் குறிப்பிட்ட இசை அவனது கடந்த காலத்தை நினைவூட்டுகிறது. கதை அப்படியே நினைவலைகளாகப் பின்னோக்கிச்செல்கிறது.
நியூயார்க் இரவு விடுதி ஒன்றின் பியானோ கலைஞனான அல், அங்கே பாடி நடனமாடும் சூ ஹார்வியைக் காதலிக்கிறான். அவளை மணக்க விரும்புகிறான். அவளோ ஹாலிவுட்டில் செட்டிலான பிறகு மணமுடிக்கலாம் என்று கலிபோர்னியா புறப்படுகிறாள். சில நாட்களுக்குப் பின் தொலைபேசியில் அவளைத் தொடர்பு கொள்ளும் அல், அவள் வாய்ப்புகளின்றி அலைவதைக் கேட்டு நேரில் சந்திக்கக் கிளம்புகிறான்.
அவனிடம் சாப்பாட்டுக்கு மட்டுமே பணம் இருப்பதால், சாலையில் செல்லும் வாகனங்களை நிறுத்தி, பலரிடமும் லிப்ட் கேட்டுத் தன் பயணத்தைத் தொடர்கிறான். அரிசோனா பகுதியில், சார்லஸ் ஹாஸ்கெல் என்ற பணக்கார ‘புக்கர்’ தன் சொகுசு காரில் லிப்ட் தந்து, உணவும் வாங்கித் தருகிறார்.
தன் கையில் இருக்கும் நகக்கீறல்களைக் காட்டி, ஒரு முரட்டுப் பெண் தன்னைக் கீறிவிட்டதாகக் கூறுகிறார். பயணக் களைப்பில் ஹாஸ்கெல் தூங்கிவிட, அல் காரை ஓட்டுகிறான். இரவில் பலத்த மழை பெய்ய, காரின் மேற்கூரையை மூட நினைத்த அல், ஹாஸ்கெலை எழுப்புகிறான். அவர் எழவில்லை.
காரை நிறுத்தி கதவைத் திறக்கும்போது, ஹாஸ்கெல் எதிர்பாராமல் சரிந்து விழுந்து, பாறையில் தலை அடிபட்டு இறக்கிறார். போலீஸாரிடம் கூறினால் தன்னைத்தான் கொலையாளி எனச் சந்தேகப்படுவார்கள் என்று பயப்படும் அல், தன் ஏழை ஆடைகளுக்கும் அந்த விலையுயர்ந்த காருக்கும் பொருத்தமில்லை என்பதை உணர்கிறான்.
எனவே, ஹாஸ்கெல்லின் ஆடைகளை அணிந்து, அவரது பணம், ஓட்டுநர் உரிமத்தைக் கைப்பற்றி ஹாஸ்கெல்லாகவே மாறுகிறான். உடலைப் பள்ளத்தாக்கில் வீசிவிட்டு, செக்போஸ்ட்டில் “சார்லஸ் ஹாஸ்கெல்” என்று பொய் சொல்லி கலிபோர்னியா எல்லைக்குள் நுழைகிறான்.
பெட்ரோல் பங்க் அருகே தனியே நின்ற வேரா என்ற பெண்ணுக்கு அல், லிப்ட் தருகிறான். அது அவன் செய்த மாபெரும் தவறு! சிறிது தூரம் சென்றதும், “காரின் உண்மையான உரிமையாளரான ஹாஸ்கெல்லை எங்கே கொன்றாய்?” என அவனை மிரட்டுகிறாள். ஹாஸ்கெல்லின் கையில் நகக்கீறலை ஏற்படுத்திய ஆபத்தான பெண் இந்த வேராதான்.
அல் நடந்த உண்மையைச் சொல்ல, முதலில் அதை நம்ப மறுக்கும் வேரா, அவனது அப்பாவித்தனத்தைக் கண்டு உண்மை என உணர்கிறாள்.
ஹாலிவுட்டில் கணவன்-மனைவியாக வீடு எடுத்துத் தங்கி, காரை விற்க முயல்கிறார்கள்.
இன்சூரன்ஸ் பேப்பரைத் தேடும்போது கிடைத்த வேறு சில ஆவணங்களால், வேரா காரை விற்க மறுக்கிறாள். ஹாஸ்கெல்லின் தந்தை 15 மில்லியன் டாலர் சொத்துடைய பெரும் கோடீஸ்வரர் என்றும், அவர் மரணப்படுக்கையில் உள்ளார் என்றும் செய்தித்தாளில் படிக்கிறாள்.
15 வருடங்களாகப் பிரிந்திருக்கும் மகனின் இடத்தை அல் பிடித்து, அந்தச் சொத்தை ஏமாற்றிப் பறிக்கத் திட்டம் தீட்டுகிறாள். மாட்டிக்கொண்டால் தூக்குத் தண்டனை உறுதி என அல் மறுக்கிறான்.
இரவில் நன்றாக மது அருந்திய வேரா, அல் தன் திட்டத்துக்குச் சம்மதிக்காவிட்டால் போலீஸிடம் மாட்டிவிடுவதாக மிரட்டுகிறாள். பின்னர் போனை எடுத்துக்கொண்டு படுக்கையறைக்குள் சென்று கதவைப் பூட்டிக் கொள்கிறாள். அவளைத் தடுக்க நினைத்த அல், கதவு இடுக்கின் வழியே வெளியே தொங்கிக் கொண்டிருந்த நீளமான போன் ஒயரைத் தன் பக்கமாகப் பலமாக இழுக்கிறான். மறுபக்கம் திடீர் அமைதி.
அல் கதவை உடைத்துப் பார்த்தபோது, ஒயர் கழுத்தை இறுக்கியதால் வேரா உயிரிழந்திருப்பதைப் பார்த்து நிலைகுலைந்து போகிறான்.
உலகத்தின் பார்வையில் அல் ராபர்ட்ஸின் துணிகளோடு ஹாஸ்கெல்லின் உடல் கிடப்பதால், ‘அல்’ ஏற்கனவே இறந்துவிட்டான்! சட்டத்தின் பார்வையில் அவன் இப்போது வேராவைக் கொன்றதாகத் தேடப்படும் குற்றவாளி ஹாஸ்கெல்! தன் உயிருக்குயிரான காதலி சூவையும் பார்க்க முடியாமல் நாடோடியாகத் திரியும் அவன், “நான் கேட்காமலேயே ஒரு வண்டி என்னை ஏற்றிச் செல்லும்” என்று நினைத்தபடியே உணவகத்திலிருந்து வெளியேறி, சாலையில் நடக்கிறான்.
ஒரு போலீஸ் வேன் வந்து அவனை ஏற்றிச் செல்கிறது. “நீங்கள் எவ்வளவு நல்லவனாக இருந்தாலும் விதி எந்தவொரு காரணமும் இன்றி உங்களைத் துரத்திவந்து பிடித்துவிடும்” என்ற அவனது உள்மனக்குரலோடு படம் முடிவடைகிறது.
எட்கர் ஜி. உல்மர் இயக்கத்தில் 1945-ல் வெளிவந்த ‘டிடூர்’, குறைந்த பட்ஜெட்டில் உருவான உலகத் தரமான மைல்கல் திரைப்படம். மார்ட்டின் கோல்ட்ஸ்மித்தின் திரைக்கதையில், பென் கோல்மனின் கூர்மையான வசனங்களுடன் இப்படம், ஃபிலிம் நோயர் பாணிக்கே உரிய ‘வாய்ஸ்-ஓவர்’ எனப்படும் கதாநாயகனின் பின்னணிக் குரல் வழியே நகர்கிறது.
ஒரு ரோடு மூவியை செட்டுகளுக்குள் எடுத்ததில் ஒளிப்பதிவாளர் பெஞ்சமின் எச். க்ளைனின் பங்கு அளப்பரியது. பட்ஜெட் பற்றாக்குறையால் பின்னணியை மறைப்பதற்காக அவர் இருளையும் மழையையும் பயன்படுத்திய விதம், பிற்காலத்தில் ஃபிலிம் நோயரின் முக்கிய இலக்கணமாக மாறியது. 67 நிமிடங்களே ஓடும் இப்படத்தைத் தொய்வில்லாமல் கச்சிதமாகத் தொகுத்துள்ளார் எடிட்டர் ஜார்ஜ் மெக்வயர்.
‘எர்டோடி’யின் பின்னணி இசை படம் முழுவதும் தனி கதாபாத்திரமாகவே பயணிக்கிறது. பியானோ இசையும், பாடலும் கதைக்கு மேலும் வலு சேர்க்கின்றன. டாம் நீல் (அல் ராபர்ட்ஸாக): ஒரு சாமானியன் எப்படி விதியின் சதியால் மெல்ல மெல்ல குற்றவாளியாக மாறுகிறான் என்ற பரிதாபத்தையும், வேராவின் மிரட்டலுக்குப் பயந்து நடுங்கும் அப்பாவித்தனத்தையும் இயல்பாக வெளிப்படுத்தியிருக்கிறார். (நிஜ வாழ்க்கையிலும் இவர் பிற்காலத்தில் கொலை வழக்கில் சிறை சென்றார்).
ஆன் சாவேஜ் (வேராவாக): ஹாலிவுட் சினிமா வரலாற்றிலேயே மிகக் கொடூரமான, இரக்கமற்ற ‘ஃபெம் ஃபெட்டேல்’கதாபாத்திரங்களில் இவருக்கு முக்கிய இடமுண்டு. படத்தில் இவரது குரலும், பார்வையும், உக்கிரமான நடிப்பும் மிரள வைக்கின்றன. கிளாடியா ட்ரேக் (சூ ஹார்வியாக): ஒரு லட்சியத்தைத் தேடும் பாடகியாகச் சொற்ப நேரமே வந்தாலும் மனதில் நிற்கும் நடிப்பு.
நான்கு முக்கிய கதாபாத்திரங்களை மட்டுமே கொண்டு, வெறும் ஆறே நாட்களில் எடுக்கப்பட்ட ‘டிடூர்’, இன்று அமெரிக்காவின் தேசிய திரைப்பட காப்பகத்தில் போற்றிப் பாதுகாக்கப்படும் முதல் பி-கிரேடு படம் என்ற அந்தஸ்தைப் பெற்றுள்ளது.
நியூயார்க்கிலிருந்து கலிபோர்னியா நோக்கிப் பயணிக்கும் ஒரு ரோடு மூவியை, ஸ்டூடியோவின் சுவர்களுக்குள் அசாத்திய அழகியலுடன் படமாக்கிய இந்தச் சிறிய பட்ஜெட் மாஸ்டர்பீஸை, உங்கள் ஓய்வு நேரத்தில் கண்டிப்பாகப் பார்க்கலாம்!
(செவ்வாய் தோறும் படம் பார்ப்போம்)
- ramkumaraundipatty@gmail.com