பிரபல ஹாலிவுட் இயக்குநரும் நடிகருமான டேவிட் லின்ச் (David Lynch)காலமானார். அவருக்கு வயது 78.
ஹாலிவுட்டில் வெளியான, தி எலிபன்ட் மேன் (1980), ப்ளூ வெல்வெட் (1986), வைல்ட் அட் ஹார்ட் (1990), லாஸ்ட் ஹைவே (1997), இன்லேண்ட் எம்பைர் (2006) என பல படங்களை இயக்கியிருப்பவர் டேவிட் லின்ச். இவர் மார்க் ஃப்ரோஸ்ட்டுடன் இணைந்து உருவாக்கிய சின்னத்திரை தொடரான ட்வின் பீக்ஸ், உலகம் முழுவதும் கவனம் பெற்றது. கடைசியாக, டுடேஸ் நம்பர் இஸ்... என்ற வெப் தொடரைத் தயாரித்து இயக்கி இருந்தார்.
பல்வேறு விருதுகளைப் பெற்றுள்ள இவருக்குக் கடந்த 2019-ம் ஆண்டு ஆஸ்கர் அகாடமி, வாழ்நாள் சாதனையாளர் விருது வழங்கி கவுரவித்தது. நுரையீரல் பிரச்சினை காரணமாக அவதிப் பட்டு வந்த அவர், சிகிச்சை பெற்று வந்தார். இந்நிலையில் அவர் உயிரிழந்து விட்டதாக அவரது குடும்பத்தினர் தெரிவித்துள்ளனர். ஸ்டீபன் ஸ்பீல்பெர்க், நிக்கோலஸ் கேஜ், ஹியூ ஜேக்மன் உட்பட பல ஹாலிவுட் திரையுலகினர் இரங்கல் தெரிவித்துள்ளனர்.