விஜய் சேதுபதி, அரவிந்த்சாமி, அதிதி ராவ் ஹைதாரி, சித்தார்த் ஜாதவ் உள்பட பலர் நடித்துள்ள படம், ‘காந்தி டாக்ஸ்’. ஏ.ஆர்.ரஹ்மான் இசையமைக்கும் இந்தப் படத்தை மராத்தி இயக்குநர் கிஷோர் பாண்டுரங் பெலெகர் இயக்கியுள்ளார். ஜீ ஸ்டூடியோஸ் வழங்கும் இப்படம் உரையாடல்கள் இல்லாத மவுன படமாக உருவாகியுள்ளது.
பான் இந்தியா படமாக இந்தி, தமிழ், தெலுங்கு உட்பட பல்வேறு மொழிகளில் வெளியாகும் இப்படத்தின் மேக்கிங் வீடியோ ஏற்கெனவே வெளியாகி வரவேற்பைப் பெற்றது. இந்நிலையில் இதன் ரிலீஸ் தேதியை படக்குழு அறிவித்துள்ளது.
அதன்படி ஜன. 30-ம் தேதி வெளியாகிறது. இதுபற்றி இயக்குநர் கிஷோர் பாண்டுரங் பெலெகர் கூறும்போது, “காந்தி டாக்ஸ்’ என்பது மவுனத்தின் மீது வைத்த நம்பிக்கை. இந்திய சினிமா நூற்றாண்டைக் கடந்த இந்த வேளையில், அதன் அடிப்படை வடிவமான தூய நடிப்பும் உணர்ச்சியும் கொண்ட கதை சொல்லலுக்குத் திரும்ப விரும்பினோம். நடிகர்கள் அதை ஏற்றுக்கொண்டனர்.
ரஹ்மானின் இசையே இந்தப் படத்தின் குரலாக மாறியது. ஜீ ஸ்டூடியோஸ் மற்றும் மீரா சோப்ராவின் ஆதரவுடன் நேர்மையான சினிமாவை உருவாக்க முடிந்தது. இது உணர்வுகளுடன் பேசும் அபூர்வமான சினிமா அனுபவமாக இருக்கும்” என்றார்.
