மும்பை: ரிலையன்ஸ் குழுமத்தின் ஜியோ பிளாட்ஃபார்ம்ஸ் நிறவன பங்குகள் நேற்று பங்குச் சந்தையில் பட்டியலிடப்பட்டன. இதுதொடர்பான நிகழ்ச்சியில் மகன் ஆனந்த் உரையாற்றியதைக் கேட்டு நிறுவனத் தலைவர் முகேஷ் அம்பானி ஆனந்தக் கண்ணீர் வடித்தார்.
ரிலையன்ஸ் குழுமத்தின் ஜியோ பிளாட்ஃபார்ம்ஸ் நிறுவனம் முதல்முறையாக பொது பங்குகளை வெளியிட்டுள்ளது (ஐபிஓ). ஒரு பங்குக்கு 1,119 ரூபாய் என்ற விலையில் 30,213 கோடி ரூபாய் நிதி திரட்ட திட்டமிடப்பட்டது. இந்த பங்குகள் மும்பை மற்றும் தேசிய பங்குச்சந்தையில் நேற்று காலை பட்டியலிடப்பட்டன. அப்போது நடைபெற்ற நிகழ்ச்சியில் முகேஷ் அம்பானியின் மகன் ஆனந்த், மகள் இஷா அம்பானி ஆகியோர் பேசினர்.
இஷா அம்பானி பேசும்போது, “சில நாட்களுக்கு முன்பு எனது தந்தை முகேஷ் அம்பானியுடன் பேசியபோது 1977-ல் நடந்த சில நிகழ்ச்சிகளை பகிர்ந்துகொண்டார். அப்போது அவருக்கு வயது 20. அப்போதுதான் ரிலையன்ஸ் நிறுவனம் ஐபிஓ வெளியிட்டது. எனது தாத்தா திருபாய் அம்பானி இந்த முடிவை எடுத்திருந்தார்.
இப்போது ஜியோ பங்குகள் பட்டியலிடப்பட்டுள்ளன. ஜியோ நிறுவனத்தை கட்டி எழுப்புவதில் எங்கள் தந்தை மிகப்பெரிய பங்களிப்பைச் செய்தார். மற்றவர்கள் சாத்தியமில்லை என்று கைவிட்டதை சாத்தியமாக்கினார்” என்றார்.
மகன் ஆனந்த் அம்பானி பேசும்போது, “இன்று மிக முக்கியமான ஒரு சொல்லுடன் என் பேச்சைத் தொடங்குகிறேன். அந்த சொல் ‘நன்றியுணர்வு’. ஜியோவை நம்பி, இன்றைய நாளைச் சாத்தியமாக்கிய கோடிக்கணக்கான மக்களுக்கு நன்றி. பங்குச் சந்தையில் ஒலிக்கப்போகும் அந்த மணி, எனக்கு ஒரு கோயில் மணி.
ஏனெனில், வணிகம் என்பது ஒரு ‘பூஜை’தான். ஒவ்வொரு பூஜையும் ‘பிரசாதத்துடன்’ நிறைவடையும். பிரசாதம் என்பது எப்போதும் மற்றவர்களுடன் பகிர்ந்து கொள்ளப்பட வேண்டிய ஒன்று. இன்று, ஜியோ எனும் இந்த பிரசாதம் ஒட்டுமொத்த இந்தியாவுடனும் பகிர்ந்து கொள்ளப்படுகிறது” என்றார்.
அப்போது ஆனந்த் அம்பானியின் பேச்சைக் கேட்ட முகேஷ் அம்பானி ஆனந்தக் கண்ணீர் வடித்தார். கண்களில் வழிந்த கண்ணீரை அவர் அவ்வப்போது துடைத்துக் கொண்டார்.
27% உயர்வு
ஜியோ பிளாட்ஃபார்ம்ஸ் பங்குகள் நேற்று காலையில் 21.36% உயர்வுடன் (ரூ.1,358) பட்டியலிடப்பட்டது. வர்த்தகத்தின் இறுதியில் ரூ.1,419 (26.81%) என்ற விலையில் நிலைபெற்றது.
