புதுடெல்லி: இந்தியாவின் பொருளாதார வளர்ச்சி வரும் 2026-27 நிதியாண்டில் 6.8 சதவீதம் முதல் 7.2 சதவீதம் வரை இருக்கும் என்று இஒய் எகானமி வாட்ச் ஆய்வு அறிக்கையில் தெரிவிக்கப்பட்டுள்ளது.
இது குறித்து இஒய் இந்தியாவின் தலைமை கொள்கை ஆலோசகர் டி.கே.வஸ்தவா வெளியிட்டுள்ள அறிக்கையில் கூறியிருப்பதாவது: உலகின் முன்னணி பொருளாதார நாடுகளுடன் இந்தியா மேற்கொண்டு வரும் விரிவான இருதரப்பு வர்த்தக ஒப்பந்தங்களின் பயனாக நாட்டின் நடுத்தர கால வளர்ச்சி வாய்ப்புகள் பிரகாசமாகியுள்ளன.
இதன் அடிப்படையில், 2026-2027 நிதியாண்டில் இந்தியாவின் உண்மையான ஜிடிபி வளர்ச்சி 6.8 சதவீதம் முதல் 7.2 சதவீதமாக இருக்கும் என்பதை நாங்கள் மதிப்பிட்டுள்ளோம்.2047-ம் ஆண்டிற்குள் வளர்ச்சியடைந்த இந்தியா என்ற இலக்கை எட்ட வேண்டுமானால், வரி-ஜிடிபி விகிதத்தை அதிகரிக்க வேண்டும்.
ஏற்கெனவே முக்கிய வரிச் சீர்திருத்தங்கள் மேற்கொள்ளப்பட்டு விட்டதால், இனி வரி ஏய்ப்பைக் குறைத்து, வரி செலுத்துவோரின் எண்ணிக்கையை உயர்த்துவதன் மூலமே இந்த இலக்கை அடைய முடியும். இவ்வாறு வஸ்தவா கூறியுள்ளார்.
