Published : 10 Sep 2021 11:34 AM
Last Updated : 10 Sep 2021 11:34 AM

வருமான வரித் தாக்கல்; அவகாசம் டிசம்பர் 31-ம் தேதி வரை நீட்டிப்பு

வருமான வரித் தாக்கலுக்கான கால அவகாசம் வரும் டிசம்பர் 31-ம் தேதி வரை நீட்டிக்கப்பட்டுள்ளது.

வருமான வரித்துறையின் மின்-தாக்கல் தளமான www.incometax.gov.in 2021 ஜூன் 7 அன்று தொடங்கப்பட்டது. அப்போதிலிருந்தே அதிலுள்ள குறைபாடுகள் மற்றும் சிரமங்கள் குறித்து வரிசெலுத்துவோர் மற்றும் பணியாளர்கள் தகவல் அளித்து வந்தனர். பிரச்சினைகளுக்கு தீர்வு காண்பது குறித்து இத்திட்டத்திற்கான சேவை வழங்குனரான இன்போசிஸ் நிறுவனத்துடன் நிதி அமைச்சகம் தொடர்ந்து பேசி வருகிறது.

2021 செப்டம்பர் 7 வரை 8.83 கோடிக்கும் அதிகமான வரிசெலுத்துவோர் தளத்திற்குள் நுழைந்துள்ளனர். 2021 செப்டம்பரில் இதன் தினசரி சராசரி தாக்கல் 15.55 லட்சத்திற்கும் அதிகமாக உள்ளது.

2021 செம்டம்பரில் தினமும் 3.2 லட்சம் வருமான வரி விவரங்களின் தாக்கல்கள் நடைபெற்று வரும் நிலையில், 2021-22 மதிப்பீட்டு வருடத்தில் 1.19 கோடி வருமான வரி விவரங்களின் தாக்கல்கள் செய்யப்பட்டுள்ளன. இதில் 76.2 லட்சத்திற்கும் அதிகமான வரி செலுத்துவோர் ஆன்லைன் முறை மூலம் செய்துள்ளனர்.

பல்வேறு தொழில்நுட்ப சிக்கல்கள் தீர்க்கப்பட்டாலும் இன்னமும் தாக்கல் செய்வதில் சிக்கல் நீடிக்கிறது.

இந்தநிலையில் நேரடி வரிகள் வாரியம் வெளியிட்ட புதிய அறிக்கையில் கூறியிருப்பதாவது:

2021-22 மதிப்பீட்டு வருடத்திற்கான வருமான வரி தாக்கல் செய்வதற்கான கடைசி தேதி 2021 ஜூலை 31-ல் இருந்து 2021 செப்டம்பர் 30 ஆக நீட்டிக்கப்பட்டிருந்த நிலையில், அது தற்போது 2021 டிசம்பர் 31 வரை மேலும் நீட்டிக்கப்பட்டுள்ளது.

2. 2020-21-ம் வருடத்திற்கான தணிக்கை அறிக்கையை தாக்கல் செய்வதற்கான கடைசி தேதி 2021 செப்டம்பர் 30-ல் இருந்து 2021 அக்டோபர் 31 ஆக நீட்டிக்கப்பட்டிருந்த நிலையில், அது தற்போது 2022 ஜனவரி 15 வரை மேலும் நீட்டிக்கப்பட்டுள்ளது.

3. சர்வதேச பரிவர்த்தனை அல்லது சட்டத்தின் 92ஈ பிரிவின் கீழ் குறிப்பிட்ட உள்நாட்டு பரிவர்த்தனைகளில் ஈடுபட்ட நபர்கள் 2020-21-ம் வருடத்திற்காக சமர்ப்பிக்க வேண்டிய கணக்காளரிடம் இருந்து பெற்ற அறிக்கைக்கான கடைசி தேதி 2021 அக்டோபர் 31-ல் இருந்து 2021 நவம்பர் 30 ஆக நீட்டிக்கப்பட்டிருந்த நிலையில், அது தற்போது 2022 ஜனவரி 31 வரை மேலும் நீட்டிக்கப்பட்டுள்ளது.

இது தொடர்பாக மத்திய நேரடி வரிகள் வாரியம் வெளியிட்டுள்ள 2021 செப்டம்பர் 9-ம் தேதியிட்ட சுற்றறிக்கை எண் 17/2021 in F.No.225/49/2021/ITA-II-ஐ www.incometaxindia.gov.in எனும் தளத்தில் காணலாம்.
இவ்வாறு தெரிவிக்கப்பட்டுள்ளது.

தவறவிடாதீர்!

Sign up to receive our newsletter in your inbox every day!

 
x