உலக மசாலா: இந்த அப்பாவை நாளை மகளும் கொண்டாடுவார்!

இங்கிலாந்தைச் சேர்ந்த 36 வயது ஷாலோம் பெர் சாலமோன் அமெரிக்காவில் வசிக்கிறார். தன்னுடைய 9 மாதக் குழந்தை ஜோவுடன் சேர்ந்து பல வேடங்களில் ஒளிப்படங்கள் எடுத்துவருகிறார். அந்தப் படங்கள் உலகம் முழுவதும் பிரபலமாகி உள்ளன. இவரது இன்ஸ்டாகிராமில் ஒன்றரை லட்சம் பேர் பின்தொடர்கிறார்கள். “ஜோ பிறப்பதற்கு முன்பு பழைய அறைகலன்கள் விற்கும் கடையை நடத்திவந்தேன். எங்கள் நண்பர்கள் அந்தக் கால ஆடைகளை அணிந்துகொண்டு, மேஜை, நாற்காலிகளில் அமர்ந்து ஒளிப்படங்கள் எடுத்துக்கொள்வார்கள். அது எனக்கு மிகவும் பிடித்திருந்தது. என் மகள் பிறந்தவுடன் அவளுடன் சேர்ந்து வித்தியாசமான ஒளிப்படங்கள் எடுக்கும் எண்ணம் தோன்றியது. ஹவாய் நடனம், காவல் துறை அதிகாரி, தோட்டக்காரர், காட்டு உலா, சமையல்காரர், ஓவியர் என்று பலவிதமான வேடங்களையும் போட்டிருக்கிறேன். சிக்கன் வாங்கிய டப்பாவை ஜோவுக்கு ஆடையாக அணிவித்து, நான் சிக்கன் சாப்பிடுவதுபோல் இருக்கும் படமும் தோட்டத்தில் இருந்த சிங்கப் பொம்மையை நானும் ஜோவும் படுத்தபடி பைனாகுலரில் கண்காணிக்கும் படமும் மண் தொட்டியில் மலர்போல் ஜோ இருக்க, நான் தண்ணீர் ஊற்றுவதுபோல் இருக்கும் படமும் அதிக மக்களால் விரும்பப்பட்ட படங்கள். என் மனைவி கார்லிதான் ஒளிப்படக்காரர். குழந்தையைக் கவனமாக உற்று நோக்கி, சரியான தருணத்தில் படங்கள் எடுப்பது சவாலானது” என்கிறார் ஷாலோம்.

இந்த அப்பாவை நாளை மகளும் கொண்டாடுவார்!

சீனாவின் சோங்க்விங் பகுதியில் இருக்கிறது 6 தளங்கள் கொண்ட அடுக்குமாடிக் குடியிருப்பு. ஆறாவது தளத்தில் ஸோங் குடும்பம் 20 ஆண்டுகளுக்கும் மேலாக வசிக்கிறது. இந்தக் குடியிருப்புக்கு லிஃப்ட் வசதி இல்லை. ஸோங் குடும்பத்தினர் யாரும் இதை ஒரு குறையாக நினைத்ததில்லை. ஆனால் மகளைத் திருமணம் செய்துகொண்ட மாப்பிள்ளை, தினமும் 6 மாடிகள் ஏறுவதும் இறங்குவதும் கடினம் என்று சொல்லி மனைவியுடன் சண்டை போட்டுவந்தார். பொறுமையாக இருந்த ஸோங், ஒருகட்டத்தில் சொந்த செலவில் தானே ஒரு லிஃப்ட்டை அமைத்துக்கொண்டார். கட்டிடத்தின் பக்கவாட்டில் இருக்கும் இந்த லிஃப்ட், இவரது தளத்தில் மட்டும் நிற்கும். கண்ணாடியால் ஆன அழகான இந்த லிஃப்ட்டைக் கண்டு எல்லோரும் ஆச்சரியப்படுகிறார்கள். ஆனால், அனுமதியின்றி லிஃப்ட் கட்டியதற்காக, ஸோங் அரசாங்கத்தின் விசாரணைக்கு வர இருக்கிறார்.

அரசை விட மாப்பிள்ளையை சமாளிப்பது கடினம்!