ஐசிசி டெஸ்ட் தரவரிசை: 2019-ம் ஆண்டில் கோலியைத் தொடமுடியாத ஸ்மித்; ரஹானே சரிவு

சர்வதேச கிரிக்கெட் கவுன்சில் (ஐசிசி) இன்று வெளியிட்ட டெஸ்ட் போட்டிக்கான பேட்ஸ்மேன்களுக்கான தரவரிசைப் பட்டியலில் இந்திய அணியின் கேப்டன் விராட் கோலி தொடர்ந்து முதலிடத்தில் உள்ளார்.

2019-ம் ஆண்டின் முடிவில் விராட் கோலி 928 புள்ளிகளுடன் தொடர்ந்து முதலிடத்தில் உள்ளார். கோலிக்கு கடும் போட்டியளித்து வந்த ஆஸ்திரேலிய வீரர் ஸ்டீவ் ஸ்மித் 17 புள்ளிகள் குறைவாக கோலியைப் பிடிக்க முடியாமல் ஆண்டு முடிவில் 2-வது இடத்திலேயே உள்ளார்.

நியூஸிலாந்து கேப்டன் கானே வில்லியம்ஸன் 864 புள்ளிகளுடன் 3-வது இடத்திலும், இந்திய அணி வீரர் சத்தேஸ்வர் புஜாரா 791 புள்ளிகளுடன் 4-வது இடத்திலும் உள்ளார். 786 புள்ளிகளுடன் ஆஸ்திரேலிய வீரர் லாபுசாங்கே 5-வது இடத்தில் உள்ளார். இந்த 5 இடங்களும் எந்தவிதமான மாற்றமில்லாமல் இருக்கின்றன.

கராச்சியில் நடந்த இலங்கைக்கு எதிரான டெஸ்ட் போட்டியில் சதம் அடித்ததையடுத்து பாகிஸ்தான் வீரர் பாபர் ஆசம் 3 இடங்கள் முன்னேறி, 6-வது இடத்துக்கு உயர்ந்துள்ளார். இந்திய டெஸ்ட் அணியின் துணை கேப்டன் ரஹானே 6-வது இடத்தில் இருந்து 7-வது இடத்துக்குச் சரிந்துள்ளார்.

ரஹானேவைத் தொடர்ந்து 8-வது இடத்தில் ஆஸி. வீரர் டேவிட் வார்னரும், 9-வது இடத்தில் இங்கிலாந்து வீரர் ஜோ ரூட், 10-வது இடத்தில் நியூஸிலாந்து வீரர் ராஸ் டெய்லரும் உள்ளனர். முதல் 20 இடங்களில் இந்திய வீரர் மயங்க் அகர்வால் 12-வது இடத்திலும், ரோஹித் சர்மா 15-வது இடத்திலும் உள்ளனர்.

பந்துவீச்சாளர்கள் வரிசையில் ஆஸ்திரேலிய வீரர் பாட் கம்மின்ஸ் முதலிடத்தில் நீடிக்கிறார். இந்திய வீரர் பும்ரா 6-வது இடத்தில் உள்ளார். ஐசிசி டெஸ்ட் சாம்பியன்ஷிப் போட்டித் தொடர் தற்போது நடந்துவரும் நிலையில், இந்திய அணி 360 புள்ளிகளுடன் முதலிடத்தில் உள்ளது. 2-வது இடத்தில் ஆஸ்திரேலிய அணி 216 புள்ளிகளுடனும் உள்ளது. பாகிஸ்தான், இலங்கை அணி தலா 80 புள்ளிகளுடன் உள்ளன. நியூஸிலாந்து 60 புள்ளிகளுடனும், இங்கிலாந்து அணி 56 புள்ளிகளுடனும் உள்ளன.