இந்த ஞாயிறு... விருதுகளின் விருந்து!- ‘தி இந்து லிட் ஃபார் லைஃப்’ தமிழ் விருதுகள்!

மொத்தம் ஆறு பிரிவுகளில் விருதுகள் வழங்கப்படவிருக்கின்றன. சமகால இலக்கியச் சாதனையாளருக்கான ‘ஜெயகாந்தன் விருது’, பெண் படைப்புக் குரலுக்கான ‘பாரதி விருது’, விளிம்பின் முழக்கத்துக்கான ‘இன்குலாப் விருது’, இளம் எழுத்தாளருக்கான ‘பிரமிள் விருது’, அபுனைவுக்கான ‘ஏ.கே.செட்டியார் விருது’ போன்ற ஐந்து விருதுகளுடன் மூத்த எழுத்தாளர் ஒருவருக்கு ‘வாழ்நாள் சாதனையாளர் விருது’ம் வழங்கப்படவிருக்கிறது. ‘வாழ்நாள் சாதனையாளர் விருது’ ரூ.5 லட்சம் பணமுடிப்புத் தொகையையும், விருதுப் பட்டயத்தையும், சான்றிதழையும் உள்ளடக்கியது. இந்த விருது மட்டும் ஜனவரி 14, 15, 16-ம் தேதிகளில் அதே அரங்கில் நடைபெறவிருக்கும் ‘தி இந்து லிட் ஃபார் லைஃப்’ ஆங்கில நிகழ்வில் வழங்கப்படுகிறது. ஏனைய ஐந்து விருதுகளும் ஜனவரி 7-ம் தேதி நடைபெறும் ‘தி இந்து லிட் ஃபார் லைஃப்’ தமிழ் இலக்கிய நிகழ்வில் வழங்கப்படுகின்றன. மூத்த எழுத்தாளரும் நாடகாசிரியருமான இந்திரா பார்த்தசாரதி இந்த விருதுகளை விருதாளர்களுக்கு வழங்கிச் சிறப்பிக்கவிருக்கிறார். இந்த ஐந்து விருதுகளும் தலா ரூ.1 லட்சம் பணமுடிப்புத் தொகையையும், விருதுப் பட்டயத்தையும், சான்றிதழையும் உள்ளடக்கிய வையாகும்.

‘தி இந்து’ ஆசிரியர் குழுவினர், கடந்த இரண்டு மாதங்களாகத் தீவிரமாகப் பரிசீலித்து உருவாக்கிய பெரும் பட்டியலிலிருந்து தேர்ந்தெடுக்கப்பட்ட சாதனையாளர்களுக்கு இந்த விருதுகள் வழங்கப்படுகின்றன.

‘விருதுகள் சரி, விருதாளர்கள் யார் யார்’ என்று கேட்கிறீர்களா? (விருதாளர்கள் பற்றிய அறிவிப்புடன் நாளை…)