பிரதமர் நரேந்திர மோடி, கோவையில் திங்கள்கிழமை பொதுமக்கள் முன்னிலையில் வாகனப்பேரணி சென்று ஆதரவு திரட்டியபோல, சேலத்திலும் பாஜக பொதுக் கூட்டத்தில், பார்வையாளர்கள் அமர்ந்திருந்த இடத்தின் மையம் வழியாக அலங்கரிக்கப்பட்ட வாகனத்தில் சென்று ஆதரவு திரட்டினார்.

சேலம் கெஜல்நாயக்கன்பட்டியில், பாஜக சார்பில் நடைபெற்ற பிரச்சார பொதுக்கூட்டத்துக்கு பிரதமர் நரேந்திர மோடி, கேரள மாநிலம் பாலக்காட்டில் இருந்து ஹெலிகாப்டர் மூலமாக, பொதுக்கூட்டம் ஏற்பாடு செய்திருந்த இடத்தை வந்தடைந்தார்.

குறிப்பாக, பாதுகாப்பு காரணங்களுக்காக, 3 ஹெலிகாப்டகள் வந்த நிலையில், அதில் ஒன்றில் பிரதமர் மோடி வந்தார்.

ஹெலிகாப்டரில் இருந்து இறங்கியதும் நேராக, பொதுக்கூட்ட மேடைக்கு வராமல், கோவையில் வாகனப் பேரணியாக சென்று, மக்களிடம் ஆதரவு திரட்டியது போல, பொதுக்கூட்டத்தில் பார்வையாளர்கள் அமர்ந்திருந்த இடத்தின் மையம் வழியாக, அலங்கரிக்கப்பட்ட வாகனத்தில் வலம் வந்து, அவர்களிடம் ஆதரவு திரட்டினார்.

அவருடன் மாநில தலைவர் அண்ணாமலை, பாஜக தேசிய மகளிரணி தலைவர் வானதி சீனிவாசன் ஆகியோரும் உடன் வந்தனர். மோடி வாகனப் பேரணியாக வந்தபோது, அவர் மீது பார்வையாளர்கள் பாரத் மாதா கீ ஜே என முழக்கமிட்டபடி, மோடியின் மீது மலர்களை தூவி அன்பை வெளிப்படுத்தினர்.

இதன் பின்னர் பிரதமர் மோடி, மேடைக்கு சென்றார். அவருக்கு, குஜராத் மாநில மக்கள் விருப்பத்துடன் உண்ணக்கூடிய சேலத்தில் தயாரிக்கப்படும் ஜவ்வரிசியை, வெள்ளிப்பெட்டியில் வைத்து பாஜக-வினர் வழங்கினர்.

மேலும், புகழ்பெற்ற திருச்செங்கோடு அர்த்தநாரீஸ்வரர் சுவாமி சிலை, கரூர் மாவட்டத்தின் புகழ்பெற்ற பெட்ஷீட் ஆகியவையும் மோடிக்கு வழங்கப்பட்டன. | தகவல் - எஸ்.விஜயகுமார் | படங்கள்: லக்‌ஷ்மி நாராயணன்