வெனிசுலாவுக்கு ட்ரம்ப் ‘குறி’... மதுரோ பிடிபட்டது எப்படி?
வெனிசுலா தலைநகர் கராகஸ் நகரின் மீது அமெரிக்க ராணுவத்தின் சிறப்புப் படையினர் திடீர் தாக்குதல் நடத்தினர். பின்னர் அந்நாட்டு அதிபர் நிக்கோலஸ் மதுரோ மற்றும் அவரது மனைவியை அமெரிக்க படையினர் சிறைபிடித்தனர். பின்னர், அவர்களை போர்க் கப்பலில் அழைத்துச் சென்றனர்.
இருவரும் அமெரிக்காவின் நியூயார்க் நகருக்கு அழைத்துச் செல்லப்பட்டு, புரூக்ளினில் உள்ள பெருநகர தடுப்பு மையத்தில் சிறை வைக்கப்பட்டனர். அவர்கள் மீது போதைப் பொருள் பயங்கரவாதம், அமெரிக்காவுக்குள் டன் கணக்கில் கோகைனை இறக்குமதி செய்தது மற்றும் சட்டவிரோத ஆயுதங்களை வைத்திருந்தது ஆகிய குற்றச்சாட்டுகள் சுமத்தப்பட்டுள்ளன.
அமெரிக்க அதிபரின் வெள்ளை மாளிகை எக்ஸ் தளத்தில் 61 விநாடிகள் ஓடும் ஒரு வீடியோவை வெளியிட்டுள்ளது. அதில், மதுரோ அமெரிக்காவை வம்பிழுக்கும் காட்சிகளும், மதுரோவையும் அவரது மனைவி சிலியா புளோரஸையும் கைது செய்ய நடத்தப்பட்ட அதிரடி சோதனைக் காட்சிகளும் இடம்பெற்றுள்ளன. இதனிடையே, வெனிசுலா நாட்டின் இடைக்கால அதிபராக பொறுப்பேற்குமாறு துணை அதிபர் டெல்சி ராட்ரிக்ஸுக்கு அந்நாட்டு உச்ச நீதிமன்றம் உத்தரவிட்டுள்ளது.
கடந்த ஆகஸ்ட் மாதம் நிக்கோலஸ் மதுரோ ஆவேசமாக பேசும்போது, “வா, என்னைப் பிடி. உனக்காக நான் காத்திருப்பேன். கோழையே, தாமதமாக வராதே” என ட்ரம்புக்கு பகிரங்கமாக சவால் விடுத்ததாக கூறப்படுகிறது. இது ட்ரம்பை ஆத்திரப்படுத்தியதாகக் கூறப்படுகிறது. இதையடுத்து அமெரிக்க ராணுவம் கடந்த சில மாதங்களாக மதுரோவை சிறைபிடிக்க திட்டமிட்டு வந்துள்ளது தெரியவந்துள்ளது.
அதேபோல், மதுரோ பிடிபட்டதன் பின்னணியும் தெரியவந்துள்ளது. அமெரிக்க ராணுவத்தின் அதிநவீன ‘டெல்டா போர்ஸ்’ உள்ளிட்ட சிறப்புப் படைகள் பங்கேற்ற, டொனால்டு ட்ரம்ப் தொடங்கிய “ஆபரேஷன் அப் சல்யூட் ரிசால்வ்” நடவடிக்கையின் மூலம் நிக்கோலஸ் மதுரோ பிடிபட்டார். வெனிசுலா அதிபரைக் கைது செய்ய இந்த குழுவினருக்கு சுமார் 30 நிமிடங்கள் மட்டுமே ஆனதாகக் கூறப்படுகிறது.
மதுரோ, எஃகு மூலம் பலப்படுத்தப்பட்ட தனது பாதுகாப்பான அறைக்கு தப்பி ஓட முயன்றுள்ளார். அப்போது, வலுக்கட்டாயமாக இழுத்துச் செல்லப்பட்டு காவலில் எடுக்கப்பட்டார். ஆகஸ்ட் முதலே அமெரிக்க உளவுத்துறை அதிகாரிகள் மதுரோவின் ஒவ்வொரு அசைவையும் ரகசியமாகக் கண்காணித்துள்ளனர்.
அமெரிக்க முப்படைகளின் தலைமைத் தளபதி ஜெனரல் டான் கெய்ன் கூறும்போது, “அவர் எப்படி நகர்ந்தார், எங்கே வசித்தார், எங்கே பயணம் செய்தார், என்ன சாப்பிட்டார், என்ன உடை அணிந்தார், அவருடைய செல்லப்பிராணிகள் என்ன என்பது வரை அனைத்தும் கண்காணிக்கப்பட்டன” என்றார்.
இதுகுறித்து ட்ரம்ப் கூறும்போது, “இந்தத் திட்டம் பல மாத கால துல்லியமான திட்டமிடல் மற்றும் ஒத்திகைகளை உள்ளடக்கியிருந்தது. குறிப்பாக, மதுரோ தங்கியிருந்த இல்லத்தைப் போன்றே ஒரு மாதிரி வீட்டை அமெரிக்கப் படைகள் உருவாக்கி ஒத்திகை பார்த்தனர். மதுரோவை பிடிக்கும் நடவடிக்கையை நேரலையில் பார்த்தேன்” என்றார்.
வெனிசுலா மீதான அமெரிக்க ராணுவம் திடீர் தாக்குதல் நடத்தியதன் மூலம் ஒரே கல்லில் இரண்டு மாங்காயை அமெரிக்கா அடித்திருக்கிறது. வரும் காலத்தில் வெனிசுலாவின் ஒட்டுமொத்த எண்ணெய் வளமும் அமெரிக்காவின் வசமாகி டாலரின் ஆதிக்கம் அதிகரிக்கும். அதோடு வெனிசுலாவின் எண்ணெய் வணிகத்தில் சீனா கொண்டுள்ள ஆதிக்கமும் முற்றுப்புள்ளி வைக்கப்படும் எனக் கூறப்படுகிறது.
