ஜனநாயகன் முதல் அரசன் வரை: கோலிவுட் 2026-ன் ‘மெகா’ லிஸ்ட்
2026-ம் ஆண்டில் ரசிகர்களின் எதிர்பார்ப்புக்குள்ளாகி இருக்கும் திரைப்படங்கள் வரிசைக் கட்டி நிற்கின்றன. வருடத்தின் முதல் மாதத்திலேயே விஜய்யின் ஜனநாயகன், சிவகார்த்திகேயனின் பராசக்தி ஆகிய பிரம்மாண்டத் திரைப்படங்கள் வெளியாகின்றன.
தமிழக வெற்றிக்கழகத்தை நடிகர் விஜய் தொடங்கி இருப்பதால் அவருடைய கடைசி படமாகி இருக்கிறது ‘ஜனநாயகன்’. இதனாலேயே இப்படத்துக்கு அதிக எதிர்பார்ப்பு உள்ளது. ஹெச்.வினோத் இயக்கியுள்ள இப்படத்தில் பாலிவுட் நடிகர் பாபி தியோல், பூஜா ஹெக்டே, மமிதா பைஜு உள்பட பலர் நடித்துள்ளனர். பொங்கலை முன்னிட்டு ஜனவரி 9-ம் தேதி வெளியாகிறது இப்படம்.
சுதா கொங்கரா இயக்கத்தில் சிவகார்த்திகேயன் ஹீரோவாக நடித்துள்ள படம் பராசக்தி. ரவி மோகன் வில்லனாக நடித்துள்ள இதில், அதர்வா, ஸ்ரீலீலா என பலர் நடித்துள்ளனர். பொங்கலை முன்னிட்டு ஜனவரி 10-ம் தேதி இப்படம் வெளியாகிறது.
நெல்சன் திலீப் குமார் இயக்கத்தில் ரஜினிகாந்த் நடித்து வெற்றி பெற்ற ‘ஜெயிலர்’ படத்தின் அடுத்த பாகம்தான் ஜெயிலர் 2. இப்படம் ஜூன் மாதம் வெளியாகும் என்று எதிர்பார்க்கப்படுகிறது. ஆர்ஜே பாலாஜி இயக்கத்தில் சூர்யா நடித்துள்ள திரைப்படம், ‘கருப்பு’. த்ரிஷா, 2025-ல் வெளியாக இருந்த நிலையில் சில காரணங்களால் இந்த வருடம் வெளியாகிறது.
‘போர்தொழில்’ விக்னேஷ் ராஜா இயக்கத்தில் தனுஷ் நடித்துள்ள ‘தனுஷ் 54’ என்று அறியப்படும் படத்துக்கு இன்னும் பெயர் வைக்கவில்லை. இப்படம் பிப்ரவரி மாதம் வெளியாகலாம் என்று கூறப்படுகிறது. நலன் குமரசாமி இயக்கத்தில் கார்த்தி நடித்துள்ள படம் ‘வா வாத்தியார்’. இப்படம் டிசம்பரில் வெளியாக இருந்தது. பைனான்ஸ் பிரச்சினை காரணமாக வெளியாகாததால், இந்த வருடம் வெளியாக இருக்கிறது.
மித்ரன் இயக்கத்தில், கார்த்தி நடித்து கடந்த 2022-ம் ஆண்டு வெளியான படத்தின் அடுத்த பாகம் ‘சர்தார் 2’. இப்படமும் ‘டாணாக்காரன்’ தமிழ் இயக்கத்தில் அவர் தற்போது நடித்து வரும் ‘மார்ஷல்’ படமும் இந்த ஆண்டு வெளியாக இருக்கிறது. வெற்றிமாறன் இயக்கத்தில் சிம்பு நடிக்கும் படம் அரசன். வெற்றிமாறன் - சிம்பு - விஜய் சேதுபதி கூட்டணி என்பதால் இப்படத்துக்கு எதிர்பார்ப்பு உள்ளது.
ரவி மோகனின் 3 படங்கள் இந்த வருடம் வெளியாக வாய்ப்பிருக்கிறது. அறிமுக இயக்குநர் அர்ஜுனன் இயக்கத்தில் அவர் நடித்துள்ள ‘ஜீனி’ படப்பிடிப்பு முடிவடைந்துவிட்டது. அடுத்து அவர் சட்டமன்ற உறுப்பினராக நடித்துள்ள ‘கராத்தே பாபு’ படத்தின் டீஸர் வரவேற்பைப் பெற்றுள்ள நிலையில் இப்படத்துக்கு எதிர்பார்ப்பு இருக்கிறது. கார்த்திக் யோகி இயக்கத்தில் அவர் நடித்துள்ள ‘ப்ரோ கோட்’ படத்தை ரவி மோகன் ஸ்டூடியோஸ் சார்பில் அவரே தயாரிக்கிறார்.
விஷால் நடிக்கும் ‘மகுடம்’ இந்த வருடம் வெளியாக இருக்கிறது. விஜய் சேதுபதி நடித்துள்ள ‘டிரைன்’ படத்தை மிஷ்கின் இயக்கி இருக்கிறார். ‘சைக்கோ’ படத்துக்குப் பிறகு மிஷ்கின் இயக்கத்தில் வெளியாகும் படம் என்பதால் எதிர்பார்ப்புள்ளது.
ராகவா லாரன்ஸ் இயக்கத்தில் உருவாகும் ‘காஞ்சனா 4’ இந்த ஆண்டு வெளியாக இருக்கிறது. பிரதீப் ரங்கநாதனின் ‘லவ் இன்சூரன்ஸ் கம்பெனி’ படத்துக்கு எதிர்பார்ப்பு உள்ளது. ஆர்ஜே பாலாஜி இயக்கத்தில் நயன்தாரா நடித்த மூக்குத்தி அம்மன் ஹிட்டானதால், அதன் 2-ம் பாகம் இப்போது உருவாகியுள்ளது. சுந்தர் சி இயக்கியுள்ள இப்படத்தில் நயன்தாரா மூக்குத்தி அம்மனாக நடித்துள்ளார்.
