மாஸ்கோ: இந்தியாவின் பன்முகத்தன்மை ஒட்டுமொத்த உலகத்துக்கும் முன்னுதாரணமாக விளங்குவதாகவும் போரை நிறுத்த பிரதமர் மோடி சிறந்த ஆலோசனை வழங்கியதாகவும் ரஷ்ய அதிபர் விளாடிமிர் புதின் தெரிவித்துள்ளார்.
ரஷ்ய தலைநகர் மாஸ்கோவில் நடைபெற்ற சர்வதேச ரஷ்யநிபுணர்களின் வால்டாய் மன்றக் கூட்டத்தில் அவர் பேசியதாவது: இந்தியாவில் சுமார் 150 கோடி மக்கள் வசிக்கின்றனர். அவர்களில் சுமார் 60 கோடி பேர் இந்திபேசுகின்றனர். இதர மக்கள் பல்வேறு மொழிகளைப் பேசுகின்றனர். இனம், மொழி, கலாச்சார ரீதியாக பன்முகத்தன்மை கொண்ட நாடாக இந்தியா விளங்குகிறது. ஆனால் இந்திய மக்கள் அனைவரும் ஒற்றுமையுடன் வாழ்கின்றனர்.
வேற்றுமையில் ஒற்றுமை என்ற கொள்கையை இந்திய மக்கள் கடைப்பிடிக்கின்றனர். இதன்மூலம் ஒட்டுமொத்த உலகத்துக்கும் இந்தியா முன்னுதாரணமாக விளங்குகிறது. உலக நாடுகள் இந்தியாவிடம் இருந்து படிப்பினைகளை கற்க வேண்டும். இந்திய பிரதமர் மோடி எனது மிகச் சிறந்த நண்பர். உக்ரைன் போரை நிறுத்த பலமுறை அவர் என்னிடம் பேசினார். போருக்கு முற்றுப்புள்ளி வைக்க மிகச் சிறந்த ஆலோசனைகளையும் வழங்கி உள்ளார். இதற்காக அவருக்கு நன்றி கூறுகிறேன்.
ரஷ்யாவுக்கு எதிராக போர் தொடுக்க மேற்கத்திய நாடுகள் திட்டமிட்டுள்ளன. இதற்காக பால்டிக் கடல் பகுதியில் ஒத்திகையும் நடத்தி வருகின்றன. அவ்வப்போது ரஷ்ய கப்பல்களையும் பறிமுதல் செய்து வருகின்றன. ரஷ்யாவின் ஏதாவது ஒரு பகுதிமீது தாக்குதல் நடத்தப்பட்டால் எங்களிடம் இருக்கும் அனைத்து ஆயுதங்களையும் பயன்படுத்துவோம். இவ்வாறு பேசினார்.
கடந்த 2022-ம் ஆண்டு செப்டம்பரில் உஸ்பெகிஸ்தானில் ஷாங்காய் ஒத்துழைப்பு அமைப்பின் உச்சி மாநாடு நடைபெற்றது. அப்போது அதிபர் புதினை சந்தித்த மோடி, “இது போருக்கானகாலம் அல்ல” என்று நேரடியாக வலியுறுத்தினார்.
கடந்த 2024-ல் மாஸ்கோவில் இந்திய- ரஷ்ய உச்சி மாநாடு நடைபெற்றது. அப்போது அதிபர் புதினுடன் பேசிய பிரதமர் மோடி, “உக்ரைன் போரை நிறுத்த அமைதிப் பேச்சுவார்த்தையை தொடங்குங்கள்” என்று வலியுறுத்தினார். கடந்த 2025-ல் சீனாவில் நடந்த ஷாங்காய் உச்சி மாநாட்டிலும் கடந்த ஆகஸ்டில் கிர்கிஸ்தானில் நடைபெற்ற ஷாங்காய் ஒத்துழைப்பு மாநாட்டிலும் இதே கருத்தை புதினிடம் பிரதமர் மோடி எடுத்துரைத்தார். கடந்த செப்டம்பரில் டெல்லியில் நடைபெற்ற பிரிக்ஸ் உச்சி மாநாட்டின்போதும் உக்ரைன் போரை நிறுத்த புதினிடம் மோடி வற்புறுத்தினார்.
