தாராபுரம்: திருப்பூர் மாவட்டம் தாராபுரம் இடைத்தேர்தலில் தவெக சார்பில் போட்டியிடும் வேட்பாளர் சத்யபாமாவை ஆதரித்து, தமிழக முதல்வர் விஜய் இன்று தாராபுரத்தில் பிரம்மாண்ட ‘ரோட் ஷோ’ மூலம் பிரச்சாரம் செய்கிறார்.
இதற்காக, கோவை விமான நிலையத்தில் இருந்து ஹெலிகாப்டர் மூலம் தாராபுரம் வரும் முதல்வர் விஜய், தாராபுரம் - உடுமலை சாலையில் உள்ள மாருதி நகர் பகுதியில் அமைக்கப்பட்டுள்ள ஹெலிபேடில் வந்து இறங்குகிறார். அங்கிருந்து மூலனூர் வரை சுமார் 30 கிலோ மீட்டர் தொலைவுக்கு திறந்த வாகனத்தில் ‘ரோடு ஷோ’ சென்று வாக்கு சேகரிக்கிறார்.
கடந்த 2021-ம் ஆண்டு நடைபெற்ற சட்டப்பேரவைத் தேர்தலில், பாஜக சார்பில் போட்டியிட்ட எல்.முருகனுக்கு ஆதரவாகப் பிரச்சாரம் செய்ய பிரதமர் நரேந்திர மோடி தாராபுரம் வந்த போது, மாருதி நகர் பகுதியில் மூன்று சிறப்பு ஹெலிபேடுகள் அமைக்கப்பட்டன.
தற்போது அதே ஹெலிபேடைத் தூய்மைப்படுத்தி, முதலமைச்சர் விஜய்யின் வருகைக்காகத் தயார்படுத்தும் பணிகள் தீவிரமாக நடைபெற்று வருகின்றன. முதல்வரின் வருகையையொட்டி தாராபுரம் பகுதியில் திருப்பூர் மாவட்ட காவல்கண்காணிப்பாளர் சிருஷ்டிசிங் தலைமையில் பலத்த போலீஸ் பாதுகாப்பு போடப்பட்டுள்ளது.
செப்.30-ம் தேதி நடைபெற்ற தேர்தல் பொதுக்கூட்டத்தில் பேசிய முதல்வர் விஜய், இன்று 2-வது முறையாக தாராபுரத்துக்கு வருகிறார். முன்னதாக, சென்னையில் இருந்து தனி விமானத்தில் புறப்பட்டு கோவைக்குக் காலை 9.10 மணிக்கு விஜய் வருகிறார். அதைத் தொடர்ந்து ஹெலிகாப்டர் மூலமாக, தாராபுரம் செல்கிறார். பிரச்சாரம் முடிந்து மாலையில் மீண்டும் ஹெலிகாப்டர் மூலம் கோவை வந்து, விமானத்தில் சென்னை புறப்பட்டுச் செல்கிறார். வானிலை சரியில்லை என்றால் சாலை மார்க்கமாக செல்லவும் போலீஸார் பாதுகாப்பு ஏற்பாடுகளைச் செய்துள்ளனர்.
