நியூயார்க்: காலநிலை மாற்றம், செயற்கை நுண்ணறிவு ஆகியவற்றில் உலகளாவிய ஒத்துழைப்பு அவசியம் என்று ஐநா பொதுச் சபையில் ஆஸ்திரேலியா வலியுறுத்தியுள்ளது.
அமெரிக்காவின் நியூயார்க் நகரில் உள்ள ஐ.நா. தலைமையகத்தில் 81-வது ஐ.நா. பொதுச் சபை கூட்டம் நடைபெற்று வருகிறது. இதில், நேற்று (வியாழக்கிழமை) பேசிய ஆஸ்திரேலிய பிரதமர் ஆன்டனி அல்பனீஸ், “ஒவ்வொரு நாடும் எதிர்கொள்ளும் அவசர சவால்களில் ஒத்துழைப்பது, பயனுள்ள தீர்வுகளை உருவாக்குவது, ஐக்கிய நாடுகள் சபையின் அடிப்படைக் கொள்கைகளில் உறுதியாக இருப்பது ஆகியவை நமது காலத்தின் சவாலாக உள்ளன. இதில் நாம் வெற்றிபெற முடியும்; வெற்றிபெற வேண்டும்.
இரண்டாம் உலகப் போருக்குப் பிறகு மீண்டும் ஒரு போரை தடுக்கும் நோக்கில் 80 ஆண்டுகளுக்கு முன்பு ஐக்கிய நாடுகள் சபை நிறுவப்பட்டது.
இரண்டாம் உலகப் போருக்குப் பிறகு மீண்டும் ஒரு போரை தடுக்கும் நோக்கில் 80 ஆண்டுகளுக்கு முன்பு ஐக்கிய நாடுகள் சபை நிறுவப்பட்டது. ஐக்கிய நாடுகள் சபையின் பணியை வல்லரசுகளிடமோ, மிகப்பெரிய நாடுகளிடமோ அல்லது உரத்த குரல் கொண்டவர்களிடமோ மட்டும் ஒப்படைக்க முடியாது. அதேபோல், உலகின் மிகப்பெரிய நிறுவனங்களிடம் அதை ஒப்பந்த அடிப்படையில் விடவோ, தொழில்நுட்ப வளர்ச்சி வேகத்தால் அது தீர்மானிக்கப்படவோ விட முடியாது.
பாதுகாப்பான, அமைதியான, வளமான உலகத்தை வடிவமைப்பது நம் அனைவரின் கடமை. அதனால்தான், 2029-30ம் ஆண்டுக்கான ஐநா பாதுகாப்பு கவுன்சிலின் நிரந்தரமற்ற உறுப்பினர் இடத்துக்கு ஆஸ்திரேலியா போட்டியிட முயல்கிறது. நாங்கள் வெற்றி பெற்றால், ஐநா சாசனம் மற்றும் அனைத்து நாடுகளின் இறையாண்மை உள்ளிட்டவற்றை நிலைநிறுத்தப் பாடுபடுவோம்.
ஐநா பாதுகாப்பு சபையின் முடிவுகளை வடிவமைப்பதில் பரந்த அளவிலான கண்கணாட்டங்கள் இடம்பெறுவதை உறுதி செய்ய, சிறிய நாடுகள் மற்றும் நடுத்தர சக்திகளின் குரல்களை நாங்கள் வலுப்படுத்துவோம்.
உலகம் வேகமாக மாறி வருகிறது. காலநிலை மாற்றம், செயற்கை நுண்ணறிவு போன்ற வளர்ந்து வரும் தொழில்நுட்பங்கள், நாகரிகம் மற்றும் சமூக ஒற்றுமையின் சிதைவு போன்ற புதிய சிக்கல்கள் சர்வதேச சமூகத்தின் முழு கவனத்தையும் கோருகின்றன.
ஒரு நடுத்தர சக்தியாக, உலகம் எதிர்கொள்ளும் பெரிய சிக்கல்களைக் கையாள்வதற்கான புதிய யோசனைகளில் மற்றவர்களுடன் இணைந்து பணியாற்றுவதில் ஆஸ்திரேலியா ஈடுபட்டுள்ளது. இறையாண்மைத் திறனை வளர்க்கவும், நாடுகளுக்கு இறையாண்மைத் தேர்வை வழங்கவும் உதவுவதில் எங்கள் அரசாங்கம் முனைப்புடன் உள்ளது” என தெரிவித்தார்.
