அமெரிக்காவின் புதிய அதிபராக டொனால்டு ட்ரம்ப் பதவியேற்ற பிறகு ஒபாமா கேர் மருத்துவக் காப்பீடு திட்டம் வாபஸ் பெறப்பட உள்ளது. இதற்கான முதல்கட்ட நடவடிக்கைக்கு அந்த நாட்டு செனட் சபை ஒப்புதல் அளித்துள்ளது.
அமெரிக்காவின் தற்போதைய அதிபர் பராக் ஒபாமாவில் கடந்த 2010 மார்ச் 23-ம் தேதி ஒபாமா கேர் மருத்துவக் காப்பீடு திட்டம் அமல் செய்யப்பட்டது. இது மக்கள் பணத்தை தனியார் காப்பீட்டு நிறுவனங்களுக்கு தாரை வார்க்கும் திட்டம் என்று கடுமையாக விமர்சிக்கப்பட்ட திட்டமாகும்.
அதாவது 2014-ம் ஆண்டு முழு அளவில் அமல்படுத்தப்பட்ட இந்த ஒபாமாகேர் திட்டத்தின் படி அமெரிக்கர்கள் அனைவரும் அரசு அங்கீகரித்த காப்பீட்டுத் திட்டத்தை கட்டாயம் வாங்கியாக வேண்டும், இல்லையெனில் அபராதம் செலுத்த வேண்டும். அனைவருக்கும் கட்டுப்படியாகும் மருத்துவ உதவி என்ற பெயரில் பிரச்சாரிக்கப்பட்ட இத்திட்டம் அதன் கருத்தியல் தளத்தில் ‘சொந்தப் பொறுப்பு’ என்பதாகவும் பரப்புரை செய்யப்பட்டது. இதன் படி அமெரிக்க பணியாளர்கள் சம்பளத்தில் கணிசமான தொகை மருத்துவக் காப்பீடு என்று பிடித்தம் செய்யப்படும். இதனால் மற்ற கடன் உள்ளிட்ட பிரச்சினைகளை சமாளிப்பது, ஏன் ஆரோக்கியமான உணவை எடுத்துக் கொள்வது கூட சராசரி அமெரிக்கருக்கு பிரச்சினையானது.
அமெரிக்க மக்களின் வருவாயில் ஒரு பகுதியை மருத்துவ நலம் என்ற பெயரில் பிடுங்கி கார்ப்பரேட் பைகளில் திணித்த இந்த ஒபாமாகேர் திட்டத்தின் தோல்விகளும், திரைமறைவு கார்ப்பரேட் நடவடிக்கைகளும், மக்கள் பட்ட அவதிகளும் அங்கு பெரிய அளவில் புலன் விசாரணை பத்திரிகாவாதம் மூலம் அம்பலமாக, ஜனநாயகக் கட்சியின் தோல்விக்கே ஒபாமாகேர் காரணமானது என்பதோடு ட்ரம்ப் என்ற வலதுசாரி ஆளுமையின் எழுச்சிக்கும் வித்திட்டது என்று சில அமெரிக்க இடதுசாரிப் பத்திரிகைகள் குறிப்பிட்டுள்ளன.
இந்த மசோதாவின் சட்டத்திட்டங்களை இயற்றியதே மருத்துவக் காப்பீட்டு துறையைச் சேர்ந்த லாபவேட்டை செயல்திறனாளர்கள் என்பதும் குறிப்பிடத்தக்கது.
கடந்த நவம்பரில் நடந்த அமெரிக்க அதிபர் தேர்தலின்போது ஒபாமா கேர் விவகாரத்தை குடியரசு கட்சி வேட்பாளர் டொனால்டு ட்ரம்ப் எழுப்பினார். தேர்தலில் வெற்றி பெற்று அமெரிக்க அதிபரானால் ஒபாமா கேர் திட்டத்துக்குப் பதிலாக புதிய மருத்துவ காப்பீடு திட்டம் அறிமுகம் செய்யப்படும் என்று ட்ரம்ப் உறுதியளித்தார். அதிபர் தேர்தலில் அவர் வெற்றி பெற்று வரும் 20-ம் தேதி புதிய அதிபராக பதவியேற்க உள்ளது.
இந்நிலையில் ஒபாமா கேர் மருத்துவ காப்பீடு திட்டத்தை ரத்து செய்வது தொடர்பான தீர்மானம் அமெரிக்க நாடாளுமன்றத்தில் நேற்றுமுன்தினம் நிறைவேற்றப்பட்டது. அடுத்த ஒரு மாதத்தில் திட்டத்தை ரத்து செய்வதற்கான சட்டம் இயற்றப்படும் என்று ட்ரம்ப் வட்டாரங்கள் தெரிவித்துள்ளன.