வகுப்பில் எத்தனையோ பேர் இருந்தாலும் ஒருசிலர்தான் நமக்கு நெருங்கிய நண்பர்கள் ஆகிறார்கள். அதுபோலவே பள்ளிப் பருவத்தில் நாம் எத்தனையோ பாடப் பிரிவுகளை படித்தாலும், அவற்றில் ஏதோ ஒன்றில்தான் நமக்கு இயல்பாகவே ஆர்வம் கூடியிருக்கும்.
உயர்கல்விக்கு செல்லும்போது அதே துறையில் படிக்கவும், வேலைவாய்ப்பை அதே துறையில் அமைத்துக் கொள்ளவும் விரும்புவோம். இப்படி எளிதில் ஒட்டிக் கொள்ளும் படிப்பை வாழ்க்கையில் பற்றிக் கொள்ளும்போது, படிப்பும் பணியும் சுமையாக இருக்காது. அதனுடன் கூடிய எதிர்காலமும் பிரகாசமாக அமைந்துவிடும்.
நண்பர்கள் போலவே நமக்கு பிடித்த பாடங்களுடனும் இப்படி ‘கெமிஸ்ட்ரி’ நன்றாக வேலை செய்யும். அதனால்தான் பிடித்ததை படித்தால் வாழ்க்கையில் எளிதில் உயரலாம் என்று அடிக்கடி சொல்கிறோம் என்றபடி பேராசிரியர் ராகவன் இடைவெளி விட்டார். கூடியிருந்த மாணவர்களை குறுகுறுவென பார்க்கவும் செய்தார்.
வேதியியல் புதிது இனிது: பேராசிரியர் பலமுறை கூறிய கருத்து என்பதால் மாணவர்களுக்கு அது புதிதாக இல்லை. கூடவே சினிமா பார்த்துவிட்டு அது பிரமாதமான ஜோடி, ‘கெமிஸ்ட்ரி’ நல்லா அமஞ்சிருக்கு என்று சிலர் விமர்சனம் செய்தது ஏனோ சில மாணவர்களுக்கு நினைவில் வந்து போனது. இன்னும் சில மாணவர்கள் தங்களுக்குப் பிடித்த பாடம் எதுவாக அமைந்திருக்கிறது என்பதை மனதுக்குள் ஒருமுறை ஓட்டிப் பார்த்தனர்.
அப்போது அவர்கள் மத்தியிலிருந்து ஒரு மாணவி குரல் உயர்த்தி, எனக்கு கெமிஸ்ட்ரி ரொம்பவும் பிடிக்கும் என்றாள். எல்லோரும் அந்த மாணவியை விநோதமாகப் பார்த்தார்கள். டாக்டர் ஆகணும் இஞ்சினியர் ஆகணும் என்றுதான் தங்களுக்குள் அதிகம் பேசி வந்தவர்களுக்கு அந்த மாணவி வித்தியாசமாக தென்பட்டார். அப்டின்னா நீங்க பி.எஸ்சி., கெமிஸ்ட்ரி எடுத்து படிங்க. கெமிஸ்ட்ரி பாடத்தோடு நல்ல ‘கெமிஸ்ட்ரி’ கொண்ட இந்த மாணவியை கைத்தட்டி பாராட்டுவோம் என்றபடி பேராசிரியர் தானும் கைகளை உயர்த்தி தட்டினார்.
இயற்பியல், கணிதம் போல வேதியியல் பாடமும் அடிப்படையான அறிவியல் பாடங்களில் ஒன்று. அதில் ஆர்வத்தோடு படிப்பவர்களுக்கு நல்ல எதிர்காலமும் காத்திருக்கு. நம்மை சுற்றியும் நமது உடலுக்குள்ளும் சதா வேதியியல் மாற்றங்கள் நடந்து கொண்டே இருக்கும்.
நாம் சாப்பிடும் உணவு சத்துக்களாக மாறுவது, நாம் அன்றாடம் பயன்படுத்தும் பொருட்கள் அந்த நிலையை அடைவதற்கு எடுத்துக் கொண்ட மாற்றங்கள், இந்த உலகத்தில் உயிரினங்கள் தோன்றியது முதல் இன்று வரையிலான அதன் வளர்ச்சிகள் என சகலத்திலும் வேதியியல் ஒளிந்திருக்கிறது. எனவே வேதியியலை படிப்பதிலும் ஆராய்வதிலும் என்றைக்குமே தேவை குறையாது.
பலவிதமான வேதியியல் பிரிவுகள்: கெமிஸ்ட்ரி என்றதுமே பி.எஸ்சி., கெமிஸ்ட்ரி மட்டுமே பலருக்கும் நினைவுக்கு வரும். அதற்கு அப்பாலும் இளநிலை முதல் முதுநிலை மற்றும் ஆய்வு பட்டம் வரை ஏராளமான பிரிவுகளில் கெமிஸ்ட்ரியை படிக்கலாம். அப்ளைடு கெமிஸ்ட்ரி, பயோ கெமிஸ்ட்ரி போன்ற நன்கறிந்த வேதியியல் படிப்புகள் தொடங்கி விண்வெளி சார்ந்த ஆஸ்ட்ரோ கெமிஸ்ட்ரி, சூழலியல் சார்ந்த ‘என்விரான்மென்டல் கெமிஸ்ட்ரி’ என நவீன பிரிவுகளும் உள்ளன.
இளநிலை அறிவியல் மட்டுமன்றி பி.இ., பி.டெக்., என பொறியியலிலும் கெமிஸ்ட்ரியை எடுத்து படிக்கலாம். இயன்றவர்கள் ஆராய்ச்சி படிப்பு வரை முன்னேறுவது அவர்களது எதிர்காலத்துக்கு வலு சேர்க்கும். மற்றவர்கள் இளநிலை படிப்போடு அவசியமான முதுநிலை டிப்ளமோ அல்லது சான்றிதழ் படிப்புகளை முடிப்பது தகுதியை உயர்த்திக் கொள்ள உதவும்.
கெமிஸ்ட்ரி படிப்புக்கு கல்லூரி தேர்வில் கவனம் செலுத்துவது நல்லது. நல்ல ஆய்வக வசதி இதற்கான அடிப்படை தேவைகளில் முதன்மையானது. இளநிலையில் நல்ல மதிப்பெண் பெற்றால் முதுநிலையில் நாட்டின் தலைசிறந்த உயர்கல்வி நிலையங்களில் சேர்ந்து படிக்க வாய்ப்பு கிடைக்கும். இவை பெரும்பாலான மாணவர்கள் தற்போது விரும்பும் மருத்துவ மற்றும் பொறியியல் படிப்புகளைவிட உயர்வானது. பள்ளி, கல்லூரி ஆசிரியர் பணிகள், போட்டித் தேர்வுகள் மூலம் மத்திய மாநில, அரசு பணிகள், குடிமைப் பணிக்குத் தயாராவது என அடிப்படையான வாய்ப்புகள் கெமிஸ்ட்ரி பட்டப் படிப்பு முடித்தவர்களுக்கும் காத்திருக்கின்றன.
இதற்கு அப்பால் மருத்துவம், விவசாயம், அழகு சாதனங்கள், மருந்தகம், ஆய்வகம், உணவுப்பொருள் உற்பத்தி மற்றும் பதப்படுத்தல் என்று ஆரம்பித்து ஏராளமான துறைகளின் வேலைவாய்ப்புகளிலும் தங்களுக்கானதை தேர்வு செய்துகொள்ளலாம் என்று பேராசிரியர் முடித்தபோது, மாணவர்கள் அனைவரும் தங்களுக்குள் ஏதோ வேதியியல் மாற்றம் நிகழ்ந்ததுபோல உற்சாகத்தை உணர்ந்தார்கள். - கட்டுரையாளர் தொடர்புக்கு: leninsuman4k@gmail.com