ஊட்டி தாவரவியல் பூங்காவில் காட்சிப்படுத்தப்பட்டுள்ள பல்லாயிரக்கணக்கான வண்ண மலர்களை சுற்றுலா பயணிகள் நேற்று கண்டு ரசித்தனர். படம்: ஆர்.டி.சிவசங்கர்
ஊட்டி: நீலகிரி மாவட்டத்தில் இரண்டாம் சீசன் தொடங்கியதால், சுற்றுலா பயணிகள் வருகை அதிகரித்துள்ளது. பூங்காக்களில் பூத்துக் குலுங்கும் வண்ண மலர்களை சுற்றுலாப் பயணிகள் கண்டு ரசித்துச் செல்கின்றனர்.
நீலகிரி மாவட்டத்தில் ஏப்ரல், மே கோடை சீசன் காலத்தில் அதிகளவில் சுற்றுலாப் பயணிகள் ஊட்டிக்கு வருவார்கள். அதேபோல, செப்டம்பர் இறுதி வாரம் முதல் நவம்பர் வரை இரண்டாம் சீசன் காலமாகும். இந்த காலக்கட்டத்தில் பள்ளி காலாண்டு விடுமுறை மற்றும் ஆயுத பூஜை தொடர் விடு முறை வருவதால் ஊட்டிக்கு சுற்றுலாப் பயணிகள் வருகை அதிகளவில் இருக்கும். மேலும், வெளிநாட்டு பயணிகளும் 2-ம் சீசன் காலத்தில் ஊட்டிக்கு அதிகளவில் வருகின்றனர்.
நடப்பாண்டு, இரண்டாம் சீசன் தொடங்கிய நிலையில், ஊட்டி அரசு தாவரவியல் பூங்கா, குன்னூர் சிம்ஸ் பூங்கா மற்றும் படகு இல்லத்துக்கு கடந்த சில நாட்களாக ஆயிரக்கணக்கான சுற்றுலாப் பயணிகள் வந்து சென்றுள்ளனர். வார இறுதி நாளான நேற்றும் மக்கள் கூட்டம் அலைமோதியது. ஊட்டி தாவரவியல் பூங்காவில் 15,000 மலர்த் தொட்டிகள் மலர்க்காட்சி திடலில் அடுக்கி வைக்கப்பட்டுள்ளன.
குன்னூர் சிம்ஸ் பூங்காவில் 2.50 லட்சம் மலர் நாற்றுக்கள் நடவு செய்யப்பட்டுள்ளன. பூத்துக்குலுங்கும் மலர்களை கண்டு ரசிக்கும் சுற்றுலாப் பயணிகள் புகைப்படம் மற்றும் செல்ஃபி எடுத்து மகிழ்ந்தனர்.
சுற்றுலா பயணிகளின் வருகையால் ஊட்டியில் இரண்டாம் சீசன் களைகட்டியுள்ளது. வரும் வாரங்களில் தொடர் விடுமுறை காரணமாக அதிகமான சுற்றுலா பயணிகள் வருவார்கள் என்று எதிர்பார்க்கப்படுகிறது.
