பள்ளி மாணவர்களிடையே படிக்கும் திறனை ஏற்படுத்துவதும் வளர்த்தெடுப்பதும் மிகப்பெரிய சவால். ஆசிரியராக ஒவ்வொரு மாணவரின் வாசிப்பு வேகத்தையும் உச்சரிப்புச் சிக்கல்களையும் தனித்தனியாகக் கவனித்துச் சரிசெய்வது இன்னும் கடினமானது. இதற்கொரு அதிநவீனத் தீர்வாக மைக்ரோசாப்ட் நிறுவனத்தின் செய்யறிவுத் தளமான ‘Microsoft Reading Coach’ உருவெடுத்துள்ளது.
முற்றிலும் கட்டணமின்றிக் கிடைக்கும் இந்தக் கருவி, மாணவர்கள் தாங்களாகவே சத்தமாக வாசித்துப் பயிற்சி பெறவும், அவர்களின் உச்சரிப்புப் பிழைகளை உடனுக்குடன் திருத்திக்கொள்ளவும் உதவுகிறது.
தனிப்பயனாக்கப்பட்ட வாசிப்புப் பயிற்சி (Personalized Reading Practice) இந்தத் தளம் ஒவ்வொரு மாணவரின் தற்போதைய வாசிப்புத் திறனை (Reading Level) ஆய்வுசெய்து, அவர்களின் திறனுக்கு ஏற்ப பொருத்தமான கதைகளையும் கட்டுரைகளையும் பரிந்துரைக்கிறது. மாணவர்கள் தங்களுக்குப் பிடித்தமான தலைப்புகளைத் தேர்ந்தெடுத்து சுயமாகப் படித்துப் பயிற்சி பெறலாம்.
நிகழ்நேர உச்சரிப்பும் பிழை திருத்தமும் (Real-time Pronunciation Feedback)
மாணவர்கள் மைக்ரோஃபோன் வழியே உரக்கப் படிக்கும்போது, செய்யறிவுத் தொழில்நுட்பம் அவர்களின் குரலைத் துல்லியமாகப் பகுப்பாய்வு செய்கிறது. ஒரு மாணவர் குறிப்பிட்ட வார்த்தையைத் தவறாக உச்சரித்தால், உடனே அந்த வார்த்தையைச் சுட்டிக்காட்டிச் சரியான உச்சரிப்பைச் (Correct Pronunciation) சொல்லி வழிகாட்டுகிறது. இதிலுள்ள ‘Immersive Reader’ தொழில்நுட்பம், கடினமான சொற்களின் பொருளை அறியவும், படங்களைப் பார்த்துப் புரிந்துகொள்ளவும், எழுத்துக்கூட்டிப் படிக்கவும் (Syllabification) பெரிதும் உதவுகிறது.
செய்யறிவின் வழியே கதை உருவாக்கம் (AI-Generated Stories)
மாணவர்களின் வாசிப்பு ஆர்வத்தைத் தூண்டும் வகையில், அவர்களின் விருப்பத்துக்கு ஏற்பச் செய்யறிவின் துணையுடன் புதிய கதைகளை உடனடியாக உருவாக்கும் வசதியும் இதில் உள்ளது. இது மாணவர்களின் வாசிப்பு ஆர்வத்தைப் பெருக்க உதவுகிறது.
ஆசிரியர்களுக்கான முன்னேற்ற அறிக்கைகள் (Progress Tracking for Educators)
ஆசிரியர்களுக்கென அமைக்கப்பட்டிருக்கும் முகப்புப்பலகை (dashboard) மூலம் மாணவர்கள் எந்தெந்த வார்த்தைகளில் அதிகம் தடுமாறுகிறார்கள், அவர்களின் வாசிப்பு வேகமும் (Words Per Minute) துல்லியமும் எந்த அளவில் உள்ளன உள்ளிட்ட தகவல்களுடன் கூடிய விரிவான அறிக்கைகளைப் பெற முடியும்.
சுதந்திரமான, பாதுகாப்பான கற்றல் சூழல் (Safe & Independent Environment) மாணவர்கள் எத்தகைய இடையூறும் இன்றித் தங்கள் வேகத்துக்கு (At their own pace) ஏற்றபடி, எவ்விதத் தயக்கமும் இன்றிப் பயிற்சி பெற ஏதுவான டிஜிட்டல் சூழலை இத்தளம் வழங்குகிறது. ஆங்கிலம் மட்டுமன்றித் தமிழ் உள்ளிட்ட உலக மொழிகள் பலவற்றிலும் வாசித்துப் பயிற்சிபெறும் வகையில் இது வடிவமைக்கப்பட்டுள்ளது.
பிற செய்யறிவுக் கருவிகளில் இருந்து இது எவ்வாறு வேறுபடுகிறது?
Standard E-books / Audiobooks போன்றவற்றைப் பயன்படுத்தும்போது மாணவர்கள் அவற்றில் உள்ள உரைகளைக் கேட்கவும் வாசிக்கவும் மட்டுமே முடியும். Microsoft Reading Coach தளமோ, மாணவர்கள் தாங்களாகவே வாசித்து, செய்யறிவின் உதவியுடன் தங்களுடைய உச்சரிப்புப் பிழைகளைத் திருத்திக்கொள்ளும் வாய்ப்பை வழங்குகிறது. தனித்துவமான இந்தக் கற்றல் சூழலின் விளைவாக விரைவிலேயே அவர்கள் அடுத்தடுத்த வாசிப்பு நிலைகளை நோக்கி நகரத் தொடங்குகின்றனர்.
யாருக்கு இது மிகவும் பயன்படும்?
பள்ளி மாணவர்கள், மாற்று மொழி கற்போர், பெற்றோர், பள்ளி ஆசிரியர்கள். வாசிப்பின்மீது மாணவர்களுக்கு இருக்கும் பயத்தைப் போக்குவ துடன், அவர்களுக்குத் தேவையான தன்னம்பிக்கையையும் சரளமாகப் பேசும் திறனையும் வளர்ப்பதில் Microsoft Reading Coach கருவி முக்கியப் பங்காற்றுகிறது.
செய்யறிவு விதி: செய்யறிவுக் கருவிகள் அனைத்துமே மனிதர்களின் தரவுகளில் இருந்துதான் கற்கின்றன. ஆகவே அவற்றின் பதில்களில் சில சமூகச் சார்புநிலைகள் இருக்கக்கூடும். ஏதோவொரு சூழலில், அவை தவறான கருத்துகளையோ பாகுபாடுகளையோ முன்வைத்தால் அவற்றை ஏற்காதீர்கள். எப்போதும் நடுநிலையோடு தகவல்களை அணுகுங்கள்.
- மேலும் கற்கலாம்.
- கட்டுரையாளர், பேராசிரியர்,
தொழில்நுட்ப எழுத்தாளர்.