ஒளிப்படப் பகிர்வு சேவைகளில் 'இன்ஸ்டாகிராம்' கொடி கட்டி பறப்பது தெரிந்த விஷயம்தான். இன்ஸ்டாகிராமில் பகிரப்படும் ஒளிப்படங்களைப் பார்த்து ரசிக்க எத்தனையோ வழிகள் இருக்கின்றன. இப்போது இன்னும் ஒரு சுவாரஸ்யமான வழியாக, வரைபடம் மீது புதிய இன்ஸ்டாகிராம் படங்களைக் கண்டு ரசிக்க வழி செய்கிறது இன்ஸ்டாமேப் இணையதளம்.
இந்த இணையதளம் இன்ஸ்டாகிராம் ஒளிப்படங்களை, அவை எடுத்து வெளியிடப்பட்ட இடங்களின் அடிப்படையில் உலக வரைபடம் மீது சுட்டிக்காட்டுகிறது. ஆக இந்தத் தளத்தில் உங்கள் இருப்பிடத்தைத் தெரிவித்து அருகாமையில் எடுக்கப்பட்ட படங்களைப் பார்க்கலாம். அல்லது உங்களுக்கு விருப்பமான இடங்களைத் தேர்வு செய்து, அங்கு எடுக்கப்பட்ட படங்களைப் பார்த்து ரசிக்கலாம். இடத்தைத் தேர்வு செய்த பின் அதில் உள்ள கேமரா ஐகானை கிளிக் செய்தால் சரசரவென்று ஒளிப்படங்கள் 'தம்ப்நெய்ல்' காட்சிகளாக வரைபடம் மீது தோன்றுகின்றன. இன்ஸ்டாகிராம் படங்களை ரசிக்க அருமையான வழி! அதோடு பார்த்து ரசித்த படங்களைச் சமூக ஊடகங்களில் பகிரவும் செய்யலாம்.
இணையதள முகவரி: >https://instmap.com/
