தூத்துக்குடி: குடியரசு துணைத் தலைவர் சி.பி.ராதாகிருஷ்ணன் வரும் 11-ம் தேதி தூத்துக்குடி வருகிறார். வ.உ.சி. கல்லூரி மற்றும் தமிழ்நாடு மெர்க்கன்டைல் வங்கி சார்பில் நடைபெறும் விழாக்களில் அவர் கலந்து கொள்கிறார்.
குடியரசு துணைத் தலைவர் சி.பி.ராதாகிருஷ்ணன், தமிழக ஆளுநர் ராஜேந்திர விசுவநாத் அர்லேகர் ஆகியோர் வரும் 11-ம் தேதி காலை விமானம் மூலம் தூத்துக்குடி வருகின்றனர். அவர்களுக்கு விமான நிலையத்தில் அதிகாரிகள் வரவேற்பு அளிக்கின்றனர்.
காலை 11 மணிக்கு வ.உ.சி. கல்லூரியில் பவள விழாவை முன்னிட்டு நடைபெறும் முன்னாள் மாணவர்கள் சந்திப்பு நிகழ்ச்சியில் இருவரும் பங்கேற்கின்றனர். பின்னர், தூத்துக்குடி மாணிக்கம் மஹாலில் பகல் 12 மணிக்கு நடைபெறும் தமிழ்நாடு மெர்க்கன்டைல் வங்கியின் 105-வது ஆண்டு விழாவில் பங்கேற்கின்றனர்.
குடியரசு துணைத் தலைவர் மற்றும் ஆளுநர் வருகையை முன்னிட்டு, தூத்துக்குடியில் பாதுகாப்பு ஏற்பாடுகள் குறித்து, திருநெல்வேலி சரக டிஐஜி திருநாவுக்கரசு, தூத்துக்குடி எஸ்.பி. சிவபிரசாத் ஆகியோர் விமான நிலையம், வ.உ.சி. கல்லூரி வளாகம் மற்றும் மாணிக்கம் மஹால் ஆகிய இடங்களை ஆய்வு செய்து, காவல் துறை அதிகாரிகளுக்கு பல்வேறு அறிவுரைகளை வழங்கினர்.
இதுபோல், ஆட்சியர் விஷு மகாஜன் நேற்று காலையில் வ.உ.சி. கல்லூரி அரங்கம் உள்ளிட்ட இடங்களை பார்வையிட்டு அங்கு செய்ய வேண்டிய ஏற்பாடுகள் குறித்து அதிகாரிகளுக்கு ஆலோசனை வழங்கினார். ஆய்வின் போது தூத்துக்குடி மாநகராட்சி ஆணையர் சி.பிரியங்கா, தமிழ்நாடு மெர்க்கன்டைல் வங்கி நிர்வாக அலுவலர் அசோக்குமார், துணைத் தலைவர் லட்சுமி பிரகாஷ், வ.உ.சி. கல்லூரி முதல்வர் சொ.வீரபாகு உள்ளிட்டோர் உடனிருந்தனர்.
குடியரசு துணைத் தலைவர் சி.பி.ராதாகிருஷ்ணன் வரும் 11-ம் தேதி தூத்துக்குடி வரும் நிலையில் பாதுகாப்பு ஏற்பாடுகள் குறித்து விமான நிலையத்தில் டிஐஜி திருநாவுக்கரசு, எஸ்.பி. சிவபிரசாத் ஆகியோர் ஆய்வு செய்தனர்.குடியரசு துணைத் தலைவர் பங்கேற்கும் விழா நடைபெறும் தூத்துக்குடி வ.உ.சி. கல்லூரி அரங்கில் மாவட்ட ஆட்சியர் விஷு மகாஜன் ஆய்வு செய்தார்.
