தவெக வேட்பாளர் மரகதம் குமரவேலை ஆதரித்து மதச்சார்பற்ற சமூகநீதி வெற்றிக் கூட்டணி பிரச்சாரப் பொதுக்கூட்டம் மதுராந்த கத்தில் நேற்று நடந்தது. மதிமுக பொதுச் செயலாளர் வைகோ, தமிழக காங்கிரஸ் தலைவர் மாணிக்கம் தாகூர், விசிக தலைவர் திருமாவளவன், அமைச்சர்கள் ஆனந்த், ஆதவ் அர்ஜுனா, விஸ்வநாதன் உள்ளிட்டோர் பங்கேற்றனர். படம்: எம்.முத்துகணேஷ்
மதுராந்தகம்: தவெக வேட்பாளர் மரகதம் குமரவேலை ஆதரித்து, மதச்சார்பற்ற சமுகநீதி வெற்றிக் கூட்டணி சார்பில் மதுராந்தகம் அருகே நேற்று பிரச்சாரப் பொதுக்கூட்டம் நடைபெற்றது. இதில், மதிமுக பொதுச் செயலாளர் வைகோ, தமிழக காங்கிரஸ் தலைவர் மாணிக்கம் தாகூர், விசிக தலைவர் திருமாவளவன், அமைச்சர்கள் ஆனந்த், ஆதவ் அர்ஜுனா, விஸ்வநாதன், ஷாஜகான் உள்ளிட்ட பலர் பங்கேற்றனர்.
கூட்டத்தில் மதிமுக பொதுச் செயலாளர் வைகோ பேசியதாவது: மதுராந்தகம் வாக்காளர்கள் ஆலோசித்து வாக்களிக்க வேண்டும். கடந்த சில நாட்களாக பாஜகவுடன், தவெக மறைமுகமாக உறவாடுவதாக சிலர் பேசுகின்றனர். இந்துத்துவா, மதவாத சக்திகளை தமிழகத்தில் அனுமதிக்க மாட்டோம். இந்த ஆட்சியில் பெண்கள் பாதுகாப்புக்காக சிங்கப்பெண் அதிரடிப்படை தொடங்கப்பட்டுள்ளது. பள்ளி மாணவர்களுக்கான காலை உணவு திட்டத்துக்கு காமராஜர் பெயர் சூட்டப்பட்டுள்ளது. கல்விச் சாலைகளுக்கு அருகே இருந்த டாஸ்மாக் கடைகளை மூடியவர் முதல்வர் விஜய். வெற்றி தமிழ்நாடு என்ற பெயரில் 67,732 கோடிக்கு தொழில் முதலீடுகள் ஈர்க்கப்பட்டுள்ளன.
3 மாதங்களில் ஆட்சி முடியும் என சிலர் ஆரூடம் சொல்கிறார்கள். இப்போது கூறுகிறேன், 2031-ம் ஆண்டிலும் விஜய்தான் ஆட்சியில் இருப்பார். தூய்மையான, ஊழலற்ற ஆட்சி நடத்தி வருகிறார் முதல்வர் விஜய். இவ்வாறு அவர் பேசினார்.
திருமாவளவன் பேசும்போது, “புதிய அத்தியாயம் தொடங்கியிருக்கிறது. எதிர்கால அரசியலின் திசையை ஏற்படுத்தும் புதிய கூட்டணி உருவாகியுள்ளது. கடந்த காலத்தில் திமுகவுடன் இணைந்து நெடுங்காலம் பயணித்திருகிறோம். இப்போது தவெக கூட்டணியில் இணைந்திருப்பதற்கு வரலாற்று நியாயங்களை மீண்டும், மீண்டும் நினைவூட்ட வேண்டிய பொறுப்பு எனக்கு இருக்கிறது. தவெகவின் கொள்கை ஆசான்களில் ஒருவர் அம்பேத்கர், 2 பெண்களை கொள்கை தலைவர்களாக ஏற்று உள்ளனர்” என்றார்.
