சென்னை: இந்தியாவில் காலணிகள் மற்றும் தோல் பொருட்கள் உற்பத்தியில் தமிழகம் முதலிடத்தில் உள்ளதாக தமிழக அரசு பெருமிதம் தெரிவித்துள்ளது.
இதுகுறித்து, தமிழக அரசு வெளியிட்ட செய்திக்குறிப்பு: இந்தியாவின் காலணி மற்றும் தோல் பொருள்கள் உற்பத்தியின் தலைமையிடமாகத் தமிழகம் திகழ்கிறது.
இந்தியாவின் மொத்த தோல் ஏற்றுமதியில் 47 சதவீதமும், காலணி மற்றும் தோல் பொருட்கள் உற்பத்தியில் 38 சதவீதமும் தமிழகம் மட்டுமே பங்களிப்பது பெருமைக்குரிய சாதனையாகும்.
இந்தத் துறையில் 2 லட்சத்துக்கும் அதிகமான மக்கள் பணிபுரிந்து வருகின்றனர். தோல் பொருள்கள் ஏற்றுமதி மூலம் 1.25 பில்லியன் டாலர் மதிப்புள்ள வருவாயை ஈட்டுவதன் மூலம் தமிழகத்தின் பொருளாதார வளர்ச்சிக்கு, குறிப்பிடத்தக்க மிகப்பெரிய பங்களிப்பை அளிக்கிறது.
உலகளாவிய பிராண்டுகள் மற்றும் முதலீட்டாளர்களை ஈர்த்து, குறிப்பாக, பெண்கள் மற்றும் கிராமப்புற மேம்பாட்டுக்கான கொள்கைகளை வகுத்துச் செயல்படுவது, உள்ளடக்கிய மற்றும் நிலைத்தன்மையுள்ள வளர்ச்சியைத் தமிழகம் உறுதிப்படுத்தியுள்ளது என்பதை உணர்த்துகிறது. இவ்வாறு அதில் தெரிவிக்கப்பட்டுள்ளது.
