தூத்துக்குடி: திமுகவில் இருந்து வந்தவர்களுக்கு பதவி வழங்குவதாகக் கூறி தூத்துக்குடியில் தவெக நிர்வாகி விஷம் குடித்து தற்கொலைக்கு முயன்ற சம்பவம் பரபரப்பை ஏற்படுத்தியுள்ளது. மேலும் முதல்வர் விஜய்க்கு அவர் வேண்டுகோள் விடுத்து வெளியிட்ட வீடியோவும் சமூக வலைதளங்களில் பரவி வருகிறது.
தவெகவின் தூத்துக்குடி புறநகர் மாவட்ட செயலாளரும் அமைச்சருமான மதன்ராஜா, மாவட்ட மற்றும் ஒன்றிய நிர்வாகிகள் சிலரை நீக்கிவிட்டு, புதியவர்களுக்கு பொறுப்புகள் வழங்கி வருவதாக கூறப்படுகிறது. அந்த வகையில் தூத்துக்குடி தெற்கு ஒன்றிய செயலாளராக இருந்த குழந்தை ராஜா என்பவரை நீக்கிவிட்டு, திமுகவில் இருந்து வந்த பாரத் என்பவரை ஒன்றிய செயலாளராக அமைச்சர் மதன்ராஜா நியமித்துள்ளார்.
இப்பதவி மாற்றத்துக்கு எதிர்ப்பு தெரிவித்து குழந்தை ராஜாவின் ஆதரவாளரும், தவெக ஒன்றிய இளைஞர் அணிசெயலாளருமான முத்துக்குமரன் என்பவர் விஷம் அருந்தி தற்கொலைக்கு முயற்சி செய்து,அதை வீடியோ எடுத்து வெளியிட்டுள்ளார். இந்த வீடியோ சமூக வலைதளங்களில் இப்போது வேகமாக பரவி வருகிறது.
மேலும் முதல்வர் விஜய்க்கு வேண்டுகோள் விடுத்து அவர் வெளியிட்டுள்ள வீடியோவில் பேசியிருப்பதாவது: கடந்த 2000-ம் ஆண்டில் இருந்து 26 ஆண்டுகளாக உங்களது தீவிர ரசிகனாக பயணித்து வருகிறேன். நீங்கள்தான் என் உலகம், என் உயிர் என்று வாழ்ந்து வருகிறேன். நீங்கள் கட்சி தொடங்கியபோது தீவிரமாக பணியாற்றினேன். நீங்கள் முதல்வராகப் பொறுப்பேற்றிருப்பது மிக்க மகிழ்ச்சியளிக்கிறது.
ஆனால், தூத்துக்குடி புறநகர் மாவட்டம் ஓட்டப்பிடாரம் சட்டப்பேரவைத் தொகுதியில் நடக்கும் குளறுபடிகளைப் பார்க்கும்போது உங்களின் பெயர் தொடர்ந்து களங்கப்பட்டு வருகிறது. இதுகுறித்து உங்களுக்கு பலமுறை இமெயில் அனுப்பியுள்ளேன். நேரில் பேசவும் முயற்சித்தேன். ஆனால், எந்தவித நடவடிக்கையும் எடுக்கப்படவில்லை.
நமது கட்சி தேர்தலில் வெற்றி பெற்ற பிறகு, திமுகவில் இருந்து புதிதாக வந்தவர்களுக்கே கட்சியில் முக்கிய பொறுப்புகள் வழங்கப்பட்டு வருகின்றன. இதனால் நமது கட்சி திமுக கூடாரமாக மாறி வருகிறது. உங்களுக்குக் கெட்ட பெயர் ஏற்படுத்தும் நோக்கிலேயே இங்குள்ள நிர்வாகிகள் செயல்பட்டு வருகின்றனர் எனக் கூறியவாறே அவர் விஷம் அருந்தும் காட்சி வீடியோவில் உள்ளது. முத்துக்குமரன் மீட்கப்பட்டு, தூத்துக்குடி அரசு மருத்துவமனையில் அனுமதிக்கப்பட்டுள்ளார். போலீஸார் விசாரணை நடத்தி வருகின்றனர்.
