மதுரை: உசிலம்பட்டி அரசு மருத்துவமனையில் நடைபெறுவதாக இருந்த தமிழக அரசின் தாய்மாமன் தங்க மோதிர திட்ட தொடக்க விழா மதுரை அரசு ராஜாஜி மருத்துவமனைக்கு மாற்றப்பட்டுள்ளதாக தகவல் வெளியாகியுள்ளது.
தமிழகத்தில் உள்ள அரசு மருத்துவமனைகளில் பிறக்கும் குழந்தைகளுக்கு தங்க மோதிரம் வழங்கும் ‘தாய்மாமன் தங்க மோதிரம்’ திட்டத்தை முதல்வர் விஜய் கடந்த ஜூனில் அறிவித்தார். இத்திட்டத்தில் அரசு மருத்துவமனைகள், ஆரம்ப சுகாதார நிலையங்களில் கடந்த ஜூன் 22-ம் தேதி முதல் பிறந்த குழந்தைகளுக்கு ஒரு கிராம் தங்க மோதிரம் அளிக்கப்படும்.
முதலில் இத் திட்டம் அண்ணா பிறந்த நாளான செப்.15 அன்று தொடங்குவதாக அறிவிக்கப்பட்டு, பின்னர் செப்.25-ல் தொடங்கும் என கூறப்பட்டது. பின்னர் 28-ம் தேதி மதுரையில் நடைபெறும் என அறிவிக்கப்பட்டுள்ளது.
இதன்படி மதுரை மாவட்டத்தில் தற்போதுவரை 6,500 குழந்தைகள் தங்க மோதிரம் பெறும் பட்டியலில் இடம்பெற்றுள்ளனர். இக்குழந்தைகளுக்கு வழங்குவதற்கான மோதிரங்கள் மதுரை அரசு ராஜாஜி மருத்துவமனை, திருமங்கலம், உசிலம்பட்டி, மேலூர் அரசு மருத்துவமனைகளில் வைக்கப்பட்டுள்ளன.
இத்திட்டத்தை உசிலம்பட்டி அரசு மருத்துவமனையில் வரும் 28-ம் தேதி முதல்வர் விஜய் தொடங்கி வைப்பார் என முன்பு அறிவிக்கப்பட்டது. இதற்கான ஆயத்தப் பணிகள் தீவிரமாக நடைபெற்று வந்தன. சுகாதாரத் திட்ட இயக்குநர் உமா தலைமையிலான அதிகாரிகள் விழா நடைபெறவுள்ள இடத்தை ஆய்வு செய்தனர்.
இந்நிலையில், பாதுகாப்பு காரணங்களுக்காக இத்திட்ட தொடக்க விழா, உசிலம்பட்டிக்கு பதிலாக மதுரை அரசு ராஜாஜி மருத்துவமனைக்கு மாற்றப்பட்டுள்ளதாக தகவல்கள் வெளியாகியுள்ளன. இதையடுத்து, மதுரை அரசு மருத்துவமனையில் முன்னேற்பாட்டு பணிகள் நேற்று தொடங்கின.
விழா மேடையில் 50 பேருக்கு மோதிரத்தை வழங்கி திட்டத்தை முதல்வர் விஜய் தொடங்கி வைக்கிறார். அதனைத் தொடர்ந்து, பிரசவ வார்டில் அன்றைய தினத்தில் பிறந்த குழந்தைகளுக்கு முதல்வர் மோதிரம் வழங்குவார் என தெரிவிக்கப்பட்டுள்ளது.
