சென்னை: கரும்பு டன்னுக்கு ரூ.709.50 சிறப்பு ஊக்கத்தொகை வழங்கும் பணியை முதல்வர் விஜய் தொடங்கி வைத்தார்.
இதுகுறித்து, தமிழக அரசு வெளியிட்ட செய்திக்குறிப்பு: கரும்பு விவசாயிகளின் கோரிக்கையை ஏற்று, அவர்களின் வாழ்வாதாரத்தை மேம்படுத்துவதற்காகவும் கரும்பு உற்பத்தியை அதிகரிக்கவும் சர்க்கரை ஆலைகளுக்குப் பதிவு செய்து 2025-26 அரவைப் பருவத்துக்குக் கரும்பு வழங்கிய விவசாயிகளுக்குக் கரும்பு டன் ஒன்றுக்கு ரூ.709.50 சிறப்பு ஊக்கத்தொகையாக வழங்கப்படும் என முதல்வர் விஜய் சட்டப்பேரவையில் 110- விதியின் கீழ் அறிவித்தார்.
இதைத் தொடர்ந்து, திட்டத்தை தொடங்கி வைக்கும் விதமாக தலைமைச்செயலகத்தில் நேற்று 3 கரும்பு விவசாயிகளுக்கு ஊக்கத்தொகைக்கான ஆணைகளை வழங்கினார். இத்திட்டத்தின் மூலம் தமிழகம் முழுவதும் 85 ஆயிரம் கரும்பு விவசாயிகள் பயன்பெறுவர். இதற்காக, நடப்பு ஆண்டில் ரூ.603.33 கோடி அரசுக்குக் கூடுதல் செலவாகும்.
விவசாயிகளின் நலனையும், அவர்களின் பொருளாதார முன்னேற்றத்தையும் கருத்தில் கொண்ட தமிழக அரசின் இந்த நடவடிக்கை, கரும்பு விவசாயிகள் மத்தியில் மகிழ்ச்சியை ஏற்படுத்தியுள்ளது.
இந்நிகழ்வில், அமைச்சர் ர.வினோத், தலைமைச்செயலர் எம்.சாய்குமார், வேளாண்துறை செயலர் நா.வெங்கடேஷ், சர்க் கரை ஆணையர் இரா.கண்ணன், கூடுதல் இயக்குநர் ச.அருண்ராஜ் உள்ளிட்டோர் பங்கேற்றனர்.
