செங்கல்பட்டு: தீபாவளி பண்டிகை நெருங்கி வரும் நிலையில், செங்கல்பட்டு மாவட்டம் முழுவதும் உள்ள ரேஷன் கடைகளில் பாமாயில், துவரம் பருப்பு தட்டுப்பாடு ஏற்பட்டுள்ளதாகப் புகார் எழுந்துள்ளது.
தமிழகத்தில் குடும்ப அட்டைதாரர்களுக்கு ரேஷன் கடைகள் மூலம் அரிசி, சர்க்கரை, கோதுமை, துவரம் பருப்பு, பாமாயில் உள்ளிட்ட அத்தியாவசியப் பொருட்கள் வழங்கப்பட்டு வருகின்றன.
குறிப்பாக துவரம்பருப்பு மற்றும் பாமாயில் ஆகியவை ஏழை, எளிய மற்றும் நடுத்தரக் குடும்பங்களின் அன்றாட சமையல் தேவைக்கு மிகவும் அவசியமான பொருட்களாக உள்ளன.
தீபாவளி பண்டிகைக்கு இன்னும் சில நாட்களே உள்ள நிலையில், செங்கல்பட்டு மாவட்டத்தில் பல்வேறு பகுதிகளில் உள்ள ரேஷன் கடைகளில் பாமாயில், துவரம் பருப்பு வழங்கப்படவில்லை என பொதுமக்கள் புகார் தெரிவிக்கின்றனர்.
கடை ஊழியர்களிடம் கேட்டால், இருப்பு இல்லை என்றும் சரக்கு வந்தவுடன் வழங்கப்படும் என்றும் தெரிவிப்பதாகக் கூறப்படுகிறது. இதனால் மீண்டும் மீண்டும் ரேஷன் கடைக்குச் சென்று பொருட்கள் வந்துள்ளதா என்று கேட்க வேண்டிய நிலை ஏற்பட்டுள்ளது.
எனவே செங்கல்பட்டு மாவட்டம் முழுவதும் உள்ள ரேஷன் கடைகளின் இருப்பு நிலையை ஆய்வு செய்து, தட்டுப்பாடின்றி பாமாயில், துவரம் பருப்பு விநியோகம் செய்யத் தேவையான நடவடிக்கைகளை உணவுப் பொருள் வழங்கல் துறை அதிகாரிகள் மேற்கொள்ள வேண்டும்.
தீபாவளி பண்டிகைக்கு முன்பாக அனைத்துக் குடும்ப அட்டைதாரர்களுக்கும் உரிய பொருட்கள் கிடைப்பதை உறுதி செய்ய வேண்டும் என மக்கள் எதிர்பார்க்கின்றனர்.
