பி.ஆர்.பாண்டியன்
சென்னை: ‘மேகேதாட்டுக்கு எதிரான சட்டப்பேரவை தீர்மானத்தின்போது, நடுவர் மன்றம் கோரியதை எதிர்க்கட்சித் தலைவர் உதயநிதி நியாயப்படுத்துவது கண்டனத்துக்குரியது’ என்று தமிழக காவிரி விவசாயிகள் சங்க பொதுச்செயலாளர் பி.ஆர்.பாண்டியன் தெரிவித்துள்ளார்.
இதுதொடர்பாக அவர் வெளியிட்ட அறிக்கையில் கூறியிருப்பதாவது: காவிரி நடுவர் மன்ற இறுதித் தீர்ப்பு அரசிதழில் வெளியிட்ட பிறகு, 1956-ன் மாநில நீர் தாவா சட்டம் இனி பொருந்தாது. ஏற்கெனவே மன்னர் காலத்தில் போடப்பட்ட ஒப்பந்தங்களும் பொருந்தாது என்பதை நடுவர் மன்ற இறுதித் தீர்ப்பு தெளிவாக கூறியுள்ளது. உச்ச நீதிமன்றமும் அதை ஏற்றுக்கொண்டு மத்திய அரசிதழில் வெளியிடப்பட்டு செயல்பாட்டில் உள்ள நிலையில், திமுக தன்னிச்சையாக நடுவர் மன்றம் கோர எடுத்த முடிவை நியாயப்படுத்த முயற்சிப்பதை வன்மையாகக் கண்டிக்கிறோம்.
காவிரி குறித்து எந்த ஒரு நடவடிக்கை மேற்கொள்ள வேண்டுமானாலும் அனைத்து கட்சி விவசாயிகள் அமைப்பை கூட்டி முடிவு எடுக்கப்பட வேண்டும், அல்லது சட்டமன்ற கூட்டத்தில் முடிவெடுக்கப்பட வேண்டும். ஆனால் எந்த கூட்டமும் நடத்தப்படாமல், கலந்து பேசாமல் தன் விருப்பத்துக்கு திமுக அரசு, சட்டத்துக்கு புறம்பாக கடந்த மார்ச் மாதம் கடிதம் எழுதி உள்ளது.
அதை, சட்டப்பேரவையில் முதல்வர் விஜய் தலைமையிலான அரசு கொண்டுவந்த மேகேதாட்டு அணைக்கு எதிரான தீர்மானத்தில் இடைச் செருகலாக சட்டத்துக்கு புறம்பாக, காவிரி நடுவர் மன்ற இறுதி தீர்ப்புக்கு முரணாக மேகேதாட்டுக்கு நடுவர் மன்றம் கோரும் தீர்மானத்தை நிறைவேற்றிவிட்டு, அதை நியாயப்படுத்த உதயநிதி விரும்புவதன் நோக்கம் என்ன? இதுகுறித்து தமிழக மக்களுக்கு திமுக விளக்கமளிக்க வேண்டும். இவ்வாறு அறிக்கையில் கூறப்பட்டுள்ளது.
