“பாஜகவை எதிர்த்து பேசாமல் அரசியல் செய்ய முடியாது” - மார்க்சிஸ்ட் சட்டப் பேரவைக் குழு தலைவர் நாகை மாலி நேர்காணல்

மார்க்சிஸ்ட் கட்சி ஒரு கொள்கை சார்ந்த இயக்கம். இது தனிநபர்களை மையப்படுத்திய இயக்கம் அல்ல. தலைவர்கள் மாறினாலும் தத்துவம் நிலையானது. விஜய்யும் சீமானும் இளைஞர்களை ஈர்ப்பது ஒருவித கவர்ச்சியான அரசியல் பேச்சின் மூலமாகத்தான். அது நிலையானதா என்று சொல்ல முடியாது. ஆனால், எங்கள் கட்சி தத்துவார்த்த அடிப்படையில் இளைஞர்களைத் திரட்டுகிறது. அது மெதுவாக நடந்தாலும் உறுதியாக இருக்கும்.

மத்திய அரசு கொண்டு வந்துள்ள சட்டத் தொகுப்புகள் தொழிலாளர்கள் போராடி பெற்ற உரிமைகளை மீண்டும் அவர்களிடம் இருந்து பறிக்கிறது. இதை எதிர்த்து கேரள அரசு தீர்மானம் நிறைவேற்ற உள்ளது. அதேபோல தமிழக அரசும் இந்தச் சட்டங்களை ஏற்க மாட்டோம் என சட்டப்பேரவையில் தீர்மானம் நிறைவேற்றும் என எதிர்பார்க்கிறோம்.

காவிரி டெல்டாவின் கடைமடைப் பகுதியான நாகை, திருவாரூர், தஞ்சாவூர் மாவட்டங்களின் வடிகால் பகுதியாக உள்ளது. மழைக் காலங்களில் மற்ற மாவட்டங்களின் நீரும் இங்கேதான் வந்து சேர்கிறது. தற்போதுள்ள வடிகால் வசதிகள் போதுமானதாக இல்லை. அரசு இதில் கூடுதல் கவனம் செலுத்தவேண்டும். அதற்காக பிரத்யேகமான ஒரு திட்டத்தை உருவாக்கி, மழைநீரை முறையாக வெளியேற்ற அரசு நடவடிக்கை எடுக்க வேண்டும்.

ஆட்சி அதிகாரத்தில் பங்கு என்பது எங்களது நிலைப்பாடு அல்ல. அது எங்களது கோரிக்கைகளை வென்றெடுக்கப் பயன்படாது. எங்களுடைய திறமையை நிரூபிக்கக்கூடிய வகையில் ஆட்சி அதிகாரம் எங்களது கைக்கு வரவேண்டும் என்பதே எங்களது விருப்பம்.

இன்றைக்கு கட்சிக்கு இருக்கும் செல்வாக்கையொட்டி கடந்த முறை போட்டியிட்ட இடங்களை விட இம்முறை கூடுதலான இடங்கள் வேண்டும் என்பதை அழுத்தமாக வலியுறுத்துவோம். அந்தவகையில் மார்க்சிஸ்ட் கட்சிக்கு நிச்சயமாக இரட்டை இலக்கத்தில் இடங்கள் கிடைக்கும் என எதிர்பார்க்கலாம்.

விஜய்யின் வருகையால் எந்தக் கட்சியின் வாக்குகள் பிரியும் என்பதை என்னால் சொல்ல முடியாது. ஆனால், திமுக கூட்டணியின் வாக்குகள் சிதறுவதற்கான வாய்ப்புகள் இல்லை.

ஒரு மாநில தேர்தலின் அனுபவம், மற்ற மாநிலத்திலும் பிரதிபலிக்கும் என்பது அரசியல் புரியாமை. ஒவ்வொரு மாநிலத்துக்கும் தனித்தன்மை, பாரம்பரியம் உண்டு. இதையெல்லாம் அவ்வளவு எளிதாக உடைத்துவிட முடியாது. பிஹாரில் தேர்தல் ஆணையத்தின் துணைகொண்டு பாஜக வெற்றிபெற்றிருக்கிறது. அதேபோல் தமிழகத்தில் வென்றுவிடலாம் என்று நினைப்பது அரசியல் போதாமை.

தமிழகத்தில் ஓபிஎஸ்ஸுக்கு ஆதரவாக யார் இருக்கிறார்கள்? அவரை தவிர அவருக்கு யாரும் இல்லை. இதனாலேயே எங்கு செல்வது என்று தெரியாமல் அலைமோதிக் கொண்டிருக்கிறார். செங்கோட்டையனும் இருக்கக்கூடிய இடத்தில் இருந்தால் தான் அவருக்கு மதிப்பு. அந்த மதிப்பு இப்போது அவருக்கு இல்லை. ஆகவே, இவர்களெல்லாம் தவெக-வில் சேர்ந்தாலும் எந்த தாக்கத்தையும் ஏற்படுத்த மாட்டார்கள்.

தமிழகத்தில் பாஜக-வை எதிர்த்துப் பேச வேண்டிய கட்டாயம் விஜய்க்கு இருக்கிறது. இங்கு பாஜக-வை எதிர்த்துப் பேசவில்லை என்றால் அரசியல் செய்ய முடியாது. அதற்காகவே பெரியார் பற்றியும், அம்பேத்கர் பற்றியும் விஜய் பேசுகிறார். அதுதான் தமிழக மண். ஆனால், விஜய்யின் அரசியல் வேறு. எங்களுடைய அரசியல் வேறு.

திருப்பரங்குன்றத்தில் இந்து முன்னணி, பாஜக-வுக்கு எதிராக நிற்பவர்கள் யார்... இந்துக்கள் தான். இறைவழிபாடு என்பது பாரம்பரியமாக நடைபெறக்கூடியது. பல பழக்கவழக்கங்கள், நடைமுறைகள் இருக்கின்றன.

அதை பின்பற்றினால் எந்தப் பிரச்சினையும் இல்லை. இதில் அரசியல், மதத்தை கலந்து அதன்மூலம் கட்சியை வளர்த்தெடுக்க நினைக்கின்றனர். ஆன்மிகத்தை மதவெறியாக மாற்ற முயற்சிக்கின்றனர். இது தமிழக மக்களிடம் நிச்சயம் எடுபடாது.