சென்னை: திமுக அரசின் அமைச்சரவையில் முதல்வர் மு.க.ஸ்டாலின், துணை முதல்வர் உதயநிதி ஸ்டாலின் உட்பட 34 பேர் இடம் பெற்றிருந்தனர். இதில் மனோ தங்கராஜ், கயல்விழி செல்வராஜ் தவிர மீதமுள்ள 32 பேர் இந்த தேர்தலில் போட்டியிட்ட நிலையில் முதல்வர் மு.க.ஸ்டாலின் உட்பட 14 பேர் தோல்வியை தழுவியுள்ளனர்.
மூத்த அமைச்சர் துரைமுருகன் (காட்பாடி) 62,093 வாக்குகள் மட்டுமே பெற்று 3-வது இடத்தை பிடித்தார். இந்த தொகுதியில் தவெக வேட்பாளர் சுதாகர் வெற்றி பெற்றார். அமைச்சர் முத்துசாமி (ஈரோடு மேற்கு) 74,586 வாக்குகள் பெற்று தவெக வேட்பாளர் ஆனந்த மோகனிடம் 22,250 வாக்குகள் வித்தியாசத்தில் தோல்வியுற்றார்.
அமைச்சர் தா.மோ.அன்பரசன் (ஆலந்தூர்) 73,763 வாக்குகள் பெற்று தவெக வேட்பாளர் ஹரிஷிடம் 26,334 வாக்குகள் வித்தியாசத்தில் தோல்வியுற்றார். அமைச்சர் மு.பெ.சாமிநாதன் (காங்கேயம்) 59,230 வாக்குகள் மட்டுமே பெற்று 3-வது இடத்தை பிடித்தார்.
இந்த தொகுதியில் அதிமுக வேட்பாளர் என்எஸ்என்.நட்ராஜ் வெற்றி பெற்றார். அமைச்சர் ராஜேந்திரன் (சேலம் வடக்கு) 71,676 வாக்குகள் பெற்று தவெக வேட்பாளர் சிவகுமாரிடம் 14,034 வாக்குகள் வித்தியாசத்தில் தோல்வியுற்றார்.
அமைச்சர் மா.சுப்பிரமணியன் (சைதாப்பேட்டை) 52,691 வாக்குகள் பெற்று தவெக வேட்பாளர் அருள் பிரகாஷிடம் 28,514 வாக்குகள் வித்தியாசத்தில் தோல்வியுற்றார். அமைச்சர் அன்பில் மகேஷ் பொய்யாமொழி (திருவெறும்பூர்) 81,132 வாக்குகள் பெற்று தவெக வேட்பாளர் விஜயகுமாரிடம் 8,705 வாக்குகள் வித்தியாசத்தில் தோல்வியுற்றார்.
அமைச்சர் சா.மு.நாசர் (ஆவடி) 1,04,073 வாக்குகள் பெற்று தவெக வேட்பாளர் ரமேஷ்குமாரிடம் 76,311 வாக்குகள் வித்தியாசத்தில் தோல்வியுற்றார். அமைச்சர் டி.ஆர்.பி.ராஜா (மன்னார்குடி) 66,850 வாக்குகள் பெற்று அமமுக வேட்பாளர் காமராஜிடம் 1,566 வாக்குகள் வித்தியாசத்தில் தோல்வியுற்றார்.
அமைச்சர் கீதாஜீவன் (தூத்துக்குடி) 62,805 வாக்குகள் பெற்று தவெக வேட்பாளர் நாத்திடம் 37,731 வாக்குகள் வித்தியாசத்தில் தோல்வியுற்றார். அமைச்சர் பி.டி.ஆர்.பழனிவேல் தியாகராஜன் (மதுரை மத்தி) 44,286 வாக்குகள் பெற்று தவெக வேட்பாளர் மதார் பதுருதினிடம் 19,128 வாக்குகள் வித்தியாசத்தில் தோல்வியுற்றார்.
அமைச்சர் பி.மூர்த்தி (மதுரை கிழக்கு) 1,02,230 வாக்குகள் பெற்று தவெக வேட்பாளர் கார்த்திகேயனிடம் 16,547 வாக்குகள் வித்தியாசத்தில் தோல்வியுற்றார். அமைச்சர் எம்.ஆர்.காந்தி (ராணிப்பேட்டை) 85,362 வாக்குகள் பெற்று தவெக வேட்பாளர் தாஹிராவிடம் 5,787 வாக்குகள் வித்தியாசத்தில் தோல்வியுற்றார்.
அமைச்சர் மதிவேந்தன் (ராசிபுரம்) 57,845 வாக்குகள் பெற்று தவெக வேட்பாளர் முன்னாள் அதிமுக சபாநாயகர் தனபாலின் மகன் லோகேஷ் தமிழ்செல்வனிடம் 16,954 வாக்குகள் வித்தியாசத்தில் தோல்விஅடைந்தார்.
மேலும் சபாநாயகர் அப்பாவு (ராதாபுரம்) 57,634 வாக்குகள் பெற்று தவெக வேட்பாளர் சதீஷ் கிறிஸ்டோபரிடம் 12,313 வாக்குகள் வித்தியாசத்தில் தோல்வியுற்றார். துணை சபாநாயகர் பிச்சாண்டி (கீழ்பென்னாத்தூர்) 60,038 வாக்குகள் பெற்று அதிமுக வேட்பாளர் ராமசந்திரன் 30,465 வாக்குகள் வித்தியாசத்தில் தோல்வியுற்றார்.
