பள்ளிக்கல்வித் துறை அமைச்சர் ராஜ்மோகன் |கோப்புப் படம்
சென்னை: பள்ளிகளில் மாணவர்கள் மீது சாதி ரீதியாக தாக்குதல் நடைபெறுவது வேதனை அளிக்கிறது. இதில் தவறு செய்தது யாராக இருந்தாலும் நேர்மையான விசாரணை நடத்தி நடவடிக்கை எடுக்கப்படும் என்று பள்ளிக்கல்வித் துறை அமைச்சர் ராஜ்மோகன் தெரிவித்துள்ளார்.
இதுகுறித்து அமைச்சர் ராஜ்மோகன் சென்னையில் செய்தியாளர்களிடம் நேற்று கூறியதாவது: பள்ளிகளில் மாணவர்கள் மீது சாதி ரீதியாக தாக்குதல் நடைபெறுவது வேதனை அளிக்கிறது. இத்தகைய செயல்பாடுகளில் தவறு செய்தது யாராக இருந்தாலும், அவர்கள் எந்த பின் புலத்தில் இருந்து வந்தாலும் நேர்மையான விசாரணை நடத்தி நடவடிக்கை எடுக்கப்படும்.
மாணவர்கள் உடல் நலத்துக்கு உடற் கல்வி வகுப்புகள் உள்ளது போல், மனநலன் குறித்து எடுத்துரைக்க ஆசிரியர்கள் தொலைநோக்கு பார்வையுடன் இலக்குகளை நிர்ணயிக்க வேண்டும். தமிழகத்தில் குழந்தைகள் காணாமல் போகும் விவகாரத்தை காவல்துறை தீவிரமாக அணுகுகிறது. நகரங்களில் உள்ளது போலவே கிராமங்களிலும் சிசிடிவி அமைக்க காவல்துறை அறிவுறுத்துகிறது.
மேலும் இந்த விவகாரம் தொடர்பாக காவல்துறை தீவிரமான விசாரணை மேற்கொண்டுவருகிறது. பாலியல் வழக்குகள் மீது தவெக அரசு உரிய நடவடிக்கை எடுத்து வருகிறது. தவெக நிர்வாகிகள் பாலியல் சீண்டலில் ஈடுபடவில்லை. தவெக ஆதரவு இணையதளங்களில் தங்களை இணைத்துக் கொண்டவர்கள் எல்லாம் எங்கள் கட்சி நிர்வாகிகள் இல்லை.
மாநகராட்சி சார்பாக நடைபெறும் ஆய்வுகளில் மேயர் பிரியாவுக்கு அழைப்பு விடுக்காமல் அவரை புறக்கணிக்கவில்லை. கூப்பிட்டால் தான் வருவேன் என்று இருக்காமல், மரபையும் பார்க்காமல் மேயர் பிரியா ஆய்வுக்கு தாராளமாக வரலாம்.” இவ்வாறு அவர் கூறினார்.
