சென்னை: “கடந்த திமுக ஆட்சியில் தமிழக மின் துறை கட்டமைப்பில் பெரிய அளவில் எந்த மாற்றமும் செய்யப்படவில்லை” என அமைச்சர் நிர்மல் குமார் குற்றஞ்சாட்டியுள்ளார்.
சட்டப்பேரவையில் மின் துறை மானிய கோரிக்கை மீதான விவாதம் நடைபெற்றது. அப்போது அமைச்சர் சி.டி.நிர்மல் குமார் பேசியது: “கடந்த 2021-ம் ஆண்டு முதல் மின் துறைக்கு 4 அமைச்சர்கள் மாறியுள்ளனர். மற்ற துறைகளுக்கு எல்லாம் பணியாளர்கள் அதிகளவில் எடுக்கப்பட்ட நிலையில், இந்த துறையில் ஆட்கள் குறைவாகவே எடுக்கப்பட்டுள்ளனர். கடந்த 2016-21-ம் ஆண்டு காலகட்டத்தில் மின் துறையில் 9,413 பேர் எடுக்கப்பட்ட நிலையில், 2021-26-ல் 343 பேர் மட்டுமே எடுக்கப்பட்டனர். கிட்டதட்ட 15 ஆயிரம் பேர் ஓய்வு பெற்ற நிலையில், 343 பேர் மட்டுமே நியமிக்கப்பட்டனர்.
துணை மின் நிலையங்களை பொறுத்தவரை, 2016 - 21 காலகட்டத்தில் 359 நிறுவப்பட்டது. 2021 - 26-ல் 122 மட்டுமே நிறுவப்பட்டது. இதுபோன்ற கட்டமைப்பில் பெரிய அளவில் எந்த மாற்றமும் செய்யப்படவில்லை.
அதேபோல், 2016-2-ல் 84 ஆயிரம் மின்மாற்றிகளும், 2021-26-ல் 99 ஆயிரம் மின்மாற்றிகளும் வாங்கப்பட்டன. ஆனால், நமக்கான தேவைகள் அதிகமாக உள்ளது.
தற்போதுள்ள சூழலில் இந்த துறைக்கு, 593 துணை மின் நிலையங்கள் தேவைப்படுகிறது. இது தொடர்பாக 3 முறை ஆய்வு செய்து, இந்த ஆண்டு மட்டும் உடனடியாக 209 துணை மின் நிலையங்களை நிறுவ வேண்டும் என்று உத்தரவிட்டுள்ளார். அடுத்து வரும் ஆண்டுகளில் 263 துணை மின் நிலையங்கள் நிறுவ நடவடிக்கை எடுக்கப்பட்டுள்ளது” என்று அமைச்சர் கூறினார்.
