கொளத்தூர் எம்எல்ஏ வி.எஸ்.பாபு | கோப்புப் படம்
சென்னை: “நீண்ட காலமாக சிகிச்சையில் இருக்கும் தவெக எம்எல்ஏவான வி.எஸ்.பாபு உடல்நிலை குறித்து மருத்துவமனை அறிக்கை வெளியிட்டுக் கொண்டுதான் இருக்கிறது. தற்போது உடல்நிலை குறித்து மருத்துவ அறிக்கை வெளியிடச் சொல்கிறோம்” என அமைச்சர் அருண்ராஜ் தெரிவித்துள்ளார்.
இது குறித்து அவர் இன்று செய்தியாளர்களிடத்தில் கூறும்போது, “தமிழகத்தில் ஜனவரி 1 முதல் நேற்று வரை இந்த ஆண்டில் மட்டும் டெங்கு காய்ச்சல் பாதிப்பால் 10 பேர் உயிரிழந்துள்ளனர். 21,655 பேருக்கு நோய் பாதிப்பு ஏற்பட்டுள்ளது. குடியிருப்பு பகுதியில் நீர் தேங்குவதை தடுக்க வேண்டும். டெங்கு பரவல் தடுப்பில் அரசின் முயற்சிக்கு மக்கள் ஒத்துழைப்பு தர வேண்டும்.
பருவ மழைக்கால முன்னெச்சரிக்கை நடவடிக்கையாக கொசு ஒழிப்பு முயற்சிகளை பார்வையிட்டேன். சென்னையில் 3,700 பேர் வீடு வீடாக சென்று கொசு ஒழிப்பு பணியில் ஈடுபட்டுள்ளனர்.
நீண்ட காலமாக சிகிச்சையில் இருக்கும் தவெக எம்எல்ஏவான வி.எஸ்.பாபு உடல்நிலை குறித்து மருத்துவமனை அறிக்கை வெளியிட்டுக் கொண்டுதான் இருக்கிறது. தற்போது உடல்நிலை குறித்து மருத்துவ அறிக்கை வெளியிடச் சொல்கிறோம்" என்று அவர் தெரிவித்துள்ளார்.
சென்னை கொளத்தூர் தொகுதி தவெக எம்எல்ஏ வி.எஸ்.பாபு. அந்த தொகுதியில் திமுக தலைவர் மு.க.ஸ்டாலினை எதிர்த்து போட்டியிட்டு வெற்றி பெற்றதன் மூலம் தமிழகம் முழுவதும் அவர் பிரபலம் அடைந்தார். ஒரு மாதமாக நடந்து வந்த சட்டப்பேரவை கூட்டத்தொடரில் பங்கேற்ற அவருக்கு, கடந்த மாதம் 9-ம் தேதி இரவு மூச்சுத்திணறல் ஏற்பட்டது.
இதையடுத்து, அவர் சென்னை அமைந்தகரை நெல்சன் மாணிக்கம் சாலையில் உள்ள எம்ஜிஎம் ஹெல்த் கேர் மருத்துவமனையில் சேர்க்கப்பட்டார். தீவிர சிகிச்சை பிரிவில் அனுமதிக்கப்பட்டுள்ள அவருக்கு தேவைக்கு ஏற்ப செயற்கை சுவாசக் கருவி உதவியுடன் பல்துறை மருத்துவர் குழுவினர் சிகிச்சை அளித்து வருகின்றனர். கடந்த 23-ம் தேதி முதல்வர் விஜய் மருத்துவமனைக்கு சென்று வி.எஸ்.பாபுவை சந்தித்து நலம் விசாரித்தார்.
மேலும், அவருக்கு அளிக்கப்படும் சிகிச்சைகள் குறித்தும், உடல்நிலை முன்னேற்றம் குறித்தும் மருத்துவர்களிடம் கேட்டறிந்தார். வி.எஸ்.பாபு உடல்நிலை குறித்து சமூக வலைதளங்களில் அவ்வப்போது பல்வேறு தகவல்கள் வெளியாகி வந்ததால், மருத்துவமனை நிர்வாகம் அதிகாரப்பூர்வமாக அவரது உடல்நிலை அறிக்கைகளை வெளியிட்டு வந்தது. ஆனால், கடந்த 10 நாட்களுக்கு மேலாக அறிக்கைகள் வெளியாகாததால், மீண்டும் அவரது உடல்நிலை குறித்து பல்வேறு தகவல்கள் சமூக வலைதளங்களில் வெளியாகி வரும் சூழலில், அமைச்சர் அருண்ராஜ் விளக்கம் அளித்திருப்பது கவனிக்கத்தக்கது.
