

ஈரோடு: ஈரோடு திண்டல் சக்தி நகரைச் சேர்ந்தவர் சச்சிதானந்தம். லாரி உரிமையாளரான இவர், திமுக ஆட்சிக் காலத்தில் டாஸ்மாக் நிர்வாகத்துக்கு லாரிகளை வழங்கி வந்தார். திமுக ஆட்சிக் காலத்தில் முன்னாள் அமைச்சர் செந்தில் பாலாஜியுடன் தொடர்புடையதாகக் கூறப்படும் இடங்கள் மற்றும் டாஸ்மாக் விநியோக ஒப்பந்த முறைகேடு புகார்கள் தொடர்பாக வருமான வரித்துறை மற்றும் அமலாக்கத்துறை அதிகாரிகள் பல்வேறு இடங்களில் சோதனை நடத்தினர்.
இதன் ஒரு பகுதியாக, மதுபான ஆலைகளில் இருந்து டாஸ்மாக் கிடங்குகள் மற்றும் கடைகளுக்கு சரக்கு வாகனங்கள் மூலம் மதுபாட்டில்களை விநியோகம் செய்யும் ஒப்பந்ததாரராகச் செயல்பட்டு வந்த சச்சிதானந்தத்தின் வீடு மற்றும் அலுவலகத்தில் நேற்று வருமான வரித்துறை அதிகாரிகள் சோதனை நடத்தினர். டாஸ்மாக் முறைகேடு வழக்கு தொடர்பாக இந்தச் சோதனை நடைபெற்று வருவதாக அதிகாரிகள் தெரிவித்தனர். சோதனையின் முடிவில் ஆவணங்கள் ஏதேனும் கைப்பற்றப்பட்டனவா என்பது குறித்து தெரியவரும் என்றும் அவர்கள் தெரிவித்தனர்.