சென்னை: டிஎன்பிஎஸ்சி குரூப்-2, 2ஏ முதல்நிலைத் தேர்வு தமிழகம் முழுவதும் 1,647 மையங்களில் இன்று நடைபெறுகிறது. 4.90 லட்சம் பேர் தேர்வு எழுதுகின்றனர்.
தொழிலாளர் உதவி ஆய்வாளர், வணிக வரி துணை அலுவலர், இளநிலை வேலைவாய்ப்பு அலுவலர், சிறைத் துறை நன்னடத்தை அலுவலர், சார் பதிவாளர், ஜெயிலர் உள்ளிட்ட குரூப்-2 பதவிகளில் 43 காலி இடங்களையும், கூட்டுறவு பால் சங்கங்களின் முதுநிலை ஆய்வாளர், இந்து சமய அறநிலையத் துறை தணிக்கை ஆய்வாளர், முதுநிலை வருவாய் ஆய்வாளர், பேரூராட்சி செயல் அலுவலர் உள்ளிட்ட குரூப்-2ஏ பதவிகளில் 803 காலி இடங்களையும் நிரப்பும் வகையில் ஒருங்கிணைந்த குரூப்-2, 2ஏ தேர்வுக்கான அறிவிப்பை தமிழ்நாடு அரசுப் பணியாளர் தேர்வாணையம் (டிஎன்பிஎஸ்சி) கடந்த ஆக.11-ம் தேதி வெளியிட்டது. 3.06 லட்சம் பெண்கள், 1.84 லட்சம் ஆண்கள், மூன்றாம் பாலினத்தவர் 35 பேர் என மொத்தம் 4.90 லட்சம் பேர் தேர்வு எழுத தகுதி பெற்றுள்ளனர்.
இந்நிலையில், ஏற்கெனவே அறிவித்தபடி, குரூப்-2, 2ஏ முதல் நிலைத் தேர்வு சென்னையில் 173 மையங்கள் உட்பட தமிழகம் முழுவதும் 1,647 மையங்களில் இன்று காலை 9.30 மணி முதல் மதியம் 12.30 மணி வரை நடைபெறுகிறது.
அனைத்து மையங்களிலும் மாற்றுத் திறனாளிகள் தரை தளத்தில் தேர்வு எழுத வசதி செய்யப்பட்டுள்ளது. பார்வையற்றோர் தேர்வு எழுத மாற்று நபர் தனி அறைகள் கொண்ட வசதியும் அமைக்கப்பட்டுள்ளது. தேர்வு நேரம் முடிந்ததும், மாற்றுத் திறனாளிகளுக்கு மட்டும் கூடுதலாக ஒரு மணி நேரம் வழங்கப்படும்.
முறைகேடுகள் நடைபெறாமல் தடுக்க தீவிர கண்காணிப்பு நடவடிக்கைகள் மேற்கொள்ளப்படுகின்றன. மையங்களில் போலீஸ் பாதுகாப்புக்கும் ஏற்பாடு செய்யப்பட்டுள்ளது. தேர்வர்கள் மையங்களுக்கு எளிதில் செல்லும் விதமாக கூடுதல் பேருந்துகள் இயக்கப்படுகின்றன.
ஸ்மார்ட் வாட்ச் அனுமதி இல்லை
தேர்வு காலை 9.30 மணிக்கு தொடங்கும் நிலையில், தேர்வர்கள் ஒரு மணி நேரம் முன்னதாக காலை 8.30 மணிக்கு தேர்வுக் கூடத்தில் இருக்க வேண்டும். 9 மணிக்கு மேல் வந்தால் தேர்வு எழுத அனுமதிக்கப்பட மாட்டார்கள் என்று அறிவுறுத்தப்பட்டுள் ளது. தேர்வர்கள் சாதாரண கைக்கடிகாரம் கட்டி வரலாம். ஸ்மார்ட்வாட்ச் உள்ளிட்ட டிஜிட்டல் சாதனங்களுக்கு அனுமதி இல்லை என்றும் தெரிவிக்கப்பட்டுள்ளது.
