கீதாஞ்சலி,கீதா
சென்னை: ஜெம் கிரானைட்ஸ் வீரமணியின் போக்சோ வழக்கை விசாரித்து வரும் சிறப்பு புலனாய்வு குழுவில் இருந்து காவல் துணை ஆணையர் கீதாஞ்சலி விடுவிக்கப்பட்ட நிலையில், கீழ்ப்பாக்கம் துணை ஆணையர் கீதாவைப் புதிதாக நியமித்து டிஜிபி உத்தரவிட்டுள்ளார்.
16 வயது சிறுமி தற்கொலை செய்து கொண்ட வழக்கில் 22 ஆண்டுகளுக்குப் பிறகு ஜெம் வீரமணி மீது வழக்குப் பதிவு செய்யப்பட்டுள்ளது. தற்போது, தற்கொலைக்குத் தூண்டியதாகவும் ஜெம் வீரமணி மீது கூடுதலாக ஒரு பிரிவு சேர்க்கப்பட்டுள்ளது. இது ஒருபுறம் இருக்க கல்வி உதவி வழங்கியதை சுட்டிக் காட்டி சொகுசு காரில் சிறுமியை வீரமணி பாலியல் வன்கொடுமை செய்ததாகச் சிறப்புப் புலனாய்வுக் குழுவிடம் மற்றொரு புகார் அளிக்கப்பட்டது. அதுகுறித்தும் வழக்குப் பதிவு செய்யப்பட்டுள்ளது.
இந்நிலையில், இந்த வழக்கில் விசாரணை அதிகாரியாக இருந்த துணை ஆணையர் கீதாஞ்சலி, சிறப்பு புலனாய்வுக் குழுவில் இருந்து விடுவிக்கப்பட்டுள்ளார். இதற்கான உத்தரவை டிஜிபி பிறப்பித்துள்ளார். கீதாஞ்சலியின் தனிப்பட்ட விருப்பத்தின் பேரிலேயே அவர் நீக்கப்பட்டதாகத் தகவல் வெளியானது. ஆனால், அது தொடர்பான தகவல் டிஜிபி உத்தரவில் தெரிவிக்கப்படவில்லை.
கீதாஞ்சலிக்கு மாற்றாக சென்னை கீழ்ப்பாக்கம் காவல் மாவட்ட துணை ஆணையர் கீதா நியமிக்கப்பட்டுள்ளார். அவர் சிறப்புப் புலனாய்வுக் குழுவினரோடு தற்போது இணைந்து பணியைத் தொடங்கி உள்ளார். இதற்கிடையே சிறுமிகள் பாலியல் வன்கொடுமை வழக்கில் கைதான ஜெம் வீரமணி மற்றும் சாந்தி, மகேந்திர சிம்மன் ஆகியோரை குண்டர் தடுப்பு சட்டத்தின் கீழ் கைது செய்யும் நடவடிக்கைளைச் சிறப்பு புலனாய்வுக் குழுவினர் தீவிரப்படுத்தி உள்ளனர்.
அதோடு, வீரமணி மீது பாதிக்கப்பட்ட சிறுமிகள் தொடர்ந்து புகார் அளித்து வருகின்றனர். அவர்களிடம் சிறப்புப் புலனாய்வுக் குழுவினர் ரகசிய விசாரணை மேற்கொண்டுள்ளனர். இதனால், இந்த வழக்கு மேலும் பெரிதாகி வருகிறது.
