முன்னாள் நீதிபதி அரிபரந்தாமன்
சென்னை: ‘அனைத்து சாதியினருக்கும் உடனடியாக அர்ச்சகர் பணி நியமனம் வழங்க வேண்டும்’ என உயர் நீதிமன்ற முன்னாள் நீதிபதி அரிபரந்தாமன் வலியுறுத்தி உள்ளார்.
இதுதொடர்பாக சென்னையில் நேற்று செய்தியாளர்களிடம் அவர் கூறியதாவது: கடந்த 2006-ல் பிறப்பிக்கப்பட்ட அனைத்து சாதியினரும் அர்ச்சகராகும் அரசாணையை எதிர்த்து தொடரப்பட்ட வழக்கில், 2015-ல் உச்ச நீதிமன்றம் ரத்து செய்யவில்லை. தகுதியும் பயிற்சியும் பெற்ற இந்துக்கள் அனைவரும் அர்ச்சகராகலாம் என்பதை உறுதி செய்தது. தொடர்ந்து, கடந்த 2020-ம் ஆண்டு அதிமுக ஆட்சியில் வெளியிடப்பட்ட புதிய இந்து சமய அறநிலையத் துறை சேவை விதிகளின்படி, 2021-ல் திமுக அரசு 28 பேரை அர்ச்சகராக நியமித்தது.
அதைத்தொடர்ந்து, சேவை விதிகளை எதிர்த்த வழக்கில், ஆகமக் கோயில்களைப் பிரித்தறிய 2022-ம் ஆண்டு உயர் நீதிமன்றமே 5 நபர் குழு அமைத்தபோது தமிழக அரசு அதை எதிர்த்து மேல்முறையீடு செய்யாமல் வேடிக்கை பார்த்தது. மேலும், அக்குழுவில் அரசு பரிந்துரைத்த சைவப் பேராசிரியர் சத்தியவேல் முருகனாருக்கு மனுதாரர்கள் எதிர்ப்பு தெரிவித்தபோது, அரசு தரப்பு எவ்வித எதிர்ப்பும் இன்றி அவரை நீக்க ஒப்புக்கொண்டது வெட்கக்கேடானது.
ஆகமத்தை விட அரசியலமைப்பே மேலானது என்பதால், அரசு பயிற்சி பெற்ற அனைத்து சாதியினருக்கும் உடனடியாகப் அர்ச்சகருக்கான பணி நியமன ஆணைகளை வழங்க வேண்டும். தேவைப்பட்டால் சட்டப்பேரவையில் புதிய சட்டம் இயற்றி உச்ச நீதிமன்றத்தில் உறுதியோடு வாதாட வேண்டும். இவ்வாறு அவர் தெரிவித்துள்ளார்.
