சென்னை: டெல்லியில் இருந்து சென்னை வந்து கொண்டிருந்த பயணிகள் விமானத்தின் லக்கேஜ் கேபினில் திடீரென தீ பிடித்ததால், அவசரமாக ஹைதராபாத் விமான நிலையத்தில் தரையிறக்கப்பட்டது.
டெல்லியில் இருந்து நேற்று பகல் 1.30 மணிக்கு தனியார் பயணிகள் விமானம் சென்னைக்கு புறப்பட்டது. விமானத்தில் 174 பயணிகள், 6 விமான ஊழியர்கள் உட்பட 180 பேர் இருந்தனர். பிற்பகல் 3 மணி அளவில் சுமார் 36 ஆயிரம் அடி உயரத்தில் பறந்து கொண்டிருந்தபோது, விமானத்தில் உள்பகுதியில் உள்ள பயணிகள் லக்கேஜ் கேபின் பகுதியில் இருந்து புகை வெளியேறியது. இதைப் பார்த்து அதிர்ச்சி அடைந்த பயணிகள், விமான பணிப்பெண்கள், உடனடியாக விமானிக்கு தகவல் தெரிவித்தனர்.
அப்போது, விமானம் ஹைதராபாத் அருகே வந்து கொண்டு இருந்தது. அதனால், விமானி ஹைதராபாத் விமான நிலையத்துடன் அவசரமாக தொடர்புகொண்டு, தகவலை தெரிவித்தார். பின்னர் அனுமதி கிடைத்ததும், விமானத்தை ஹைதராபாத்தில் அவசரமாக தரையிறக்கினார். அதற்குள் லக்கேஜ் கேபின் பகுதி தீப்பிடித்து எரியத் தொடங்கியது. உடனடியாக விமான ஊழியர்கள், அவசர கால அணைப்பான்கள் மூலம் தீயை அணைக்க தொடங்கினர்.
விமான நிலையத்தில் இறங்கியதும் தீயணைப்புத் துறையினர் விமானத்துக்குள் சென்று தீயை முழுவதுமாக அணைத்தனர். விமானம் அவசரமாக தரையிறக்கப்பட்டதால் பெரும் அசம்பாவிதம் தவிர்க்கப்பட்டது.
பயணி ஒருவர் செல்போனுக்கு சார்ஜ் போடும் பவர் பேங்கை, லக்கேஜுக்குள் வைத்து கேபினுக்குள் வைத்திருந்ததும், அந்த பவர் பேங்கில் இருந்து மின் கசிவு ஏற்பட்டு தீ பிடித்ததாகவும் கூறப்படுகிறது. தொடர்ந்து விசாரணை நடத்தப்பட்டு வருகிறது.
