கர்நாடகாவின் மேகேதாட்டு பகுதி
மயிலாடுதுறை: மேகேதாட்டுவில் கர்நாடகா அரசு அணை கட்டுவதை தடுக்க வேண்டும் ராசிமணலில் அணை கட்டும் திட்டத்தை தமிழகம் தொடங்க வேண்டும் என்பன உள்ளிட்ட கோரிக்கைகளை வலியுறுத்தி, தமிழக காவிரி விவசாயிகள் சங்கம் சார்பில் பிரச்சாரப் பயணம் மயிலாடுதுறை மாவட்டம் பூம்புகாரில் நேற்று தொடங்கியது.
சங்கத்தின் பொதுச் செயலாளர் பி.ஆர்.பாண்டியன் தலைமை வகித்தார். தேசிய- தென்னிந்திய நதிகள் இணைப்பு விவசாயிகள் சங்க மாநிலத் தலைவர் அய்யாக்கண்ணு, தமிழ்நாடு வணிகர் சங்க பேரமைப்பின் மாவட்டத் தலைவர் தமிழ்ச்செல்வன் உள்ளிட்டோர் பேசினர். பேரமைப்பு தலைவர் ஏ.எம். விக்கிரமராஜா கொடியசைத்து பிரச்சாரப் பயணத்தை தொடங்கிவைத்தார்.
காரைக்காலில் செய்தியாளர்களிடம் பி.ஆர்.பாண்டியன் கூறியதாவது: காவிரி உபரிநீரை தமிழகம் கடலில் கலக்க செய்கிறது என கர்நாடகா முதல்வர் டி.கே.சிவகுமார் தவறான பிரச்சாரத்தில் ஈடுபடுகிறார். மேகேதாட்டுவில் அணை கட்டுவதற்கும், அதை நியாயப்படுத்துவதற்கும் சட்டவிரோத நடவடிக்கைகளில் தீவிரம் காட்டுகிறார்.
தமிழகம், புதுச்சேரி மாநில விவசாயிகளையும், அரசியல் கட்சிகளையும் ஒருங்கிணைக்கும் வகையிலும், கர்நாடகா, தமிழக விவசாயிகளின் நலனுக்காக ராசிமணலில் தமிழகம் சார்பில் அணை கட்டிக் கொள்ள ஒருமித்த கருத்தை ஏற்படுத்தும் வகையிலும் இந்தப்பிரச்சார பயணம் மேற்கொள்ளப்படுகிறது.
மேகேதாட்டு அணைக்கு எதிராக தீர்மானம் நிறைவேற்றியுள்ள புதுச்சேரி முதல்வருக்கு நன்றி. மேகேதாட்டு அணைக்கு எதிராக புதுச்சேரி அரசும் உச்ச நீதிமன்றத்தில் வழக்கு தொடுக்க வேண்டும். ராசிமணலில் அணை கட்ட வலியுறுத்தி தமிழக அரசு தீர்மானத்தை நிறைவேற்ற வலியுறுத்துவோம். இவ்வாறு தெரிவித்தார்.
இந்தப் பயணம் காரைக்கால், நாகை, திருத்துறைப்பூண்டி வழியாக மன்னார்குடியைச் சென்றடைந்தது. தொடர்ந்து, செப்.23-ம் தேதி சென்னை எழும்பூரில் பிரச்சாரக் கூட்டம், 24-ம் தேதி திருவாரூரில் பிரச்சாரப் பயண நிறைவு நிகழ்ச்சி ஆகியவை நடைபெற உள்ளதாக அறிவிக்கப்பட்டுள்ளது.
