எடப்பாடி பழனிசாமி | கோப்புப் படம்
ஈரோடு: அதிமுக சார்பில் தமிழக அரசுக்கு எதிராக நம்பிக்கையில்லாத் தீர்மானம் கொண்டுவரப்படுமா என செய்தியாளர்கள் கேள்வி எழுப்பியதற்கு, ‘எதை பொது வெளியில் பேச வேண்டும், எதை பேசக்கூடாது என்பதற்கு ஒரு வரைமுறை உள்ளது. சில கருத்துகளை இப்போது தெரிவிக்க முடியாது’ என அதிமுக பொதுச் செயலாளர் பழனிசாமி தெரிவித்தார்.
முன்னாள் முதல்வர் ஜெயலலிதாவின் பாதுகாப்பு அதிகாரியாக பணியாற்றிய பெருமாள்சாமியின் இல்லத் திருமண விழா ஈரோட்டில் நேற்று நடைபெற்றது. இதில் பங்கேற்ற பழனிசாமி, பின்னர் செய்தியாளர்களிடம் கூறியதாவது: அதிமுக சார்பில் தமிழக அரசுக்கு எதிராக நம்பிக்கையில்லா தீர்மானம் கொண்டுவரப்படுமா என கேட்கிறீர்கள்? எதை பொது வெளியில் பேச வேண்டும், எதை பேசக்கூடாது என்பதற்கு ஒரு வரைமுறை உள்ளது.
எனவே, சில கருத்துகளை இப்போது தெரிவிக்க முடியாது. நம்பிக்கையில்லாத் தீர்மானம் குறித்து செங்கோட்டையன் பேசியிருப்பது அவருடைய தனிப்பட்ட கருத்து. அத்தகைய சூழல் வரும்போது அனைத்து ஊடக நண்பர்களையும் அழைத்து தெளிவாகத் தெரிவிப்போம்.
தமிழகத்தில் சட்டம்-ஒழுங்கு அடியோடு சீர்கெட்டுவிட்டது என பலமுறை தொலைக்காட்சி மற்றும் பத்திரிகைகள் வாயிலாக தெரிவித்துள்ளேன். சட்டம்-ஒழுங்கு பிரச்சினை குறித்து முதல்வர் விஜய் கவனம் செலுத்த வேண்டும் என சட்டப்பேரவை, பத்திரிகைகள் மற்றும் ஊடகங்கள் வாயிலாக வலியுறுத்தியுள்ளோம்.
இந்த அரசு பொறுப்பேற்றது முதல் இதுவரை கொலை, கொள்ளை, திருட்டு, வழிப்பறி உள்ளிட்ட குற்றச் சம்பவங்கள் தொடர்ந்து நடைபெற்று வருகின்றன. இந்த அரசு கும்பகர்ணனைப் போல தூங்கிக் கொண்டிருக்கிறது. எத்தனை முறை தட்டி எழுப்பினாலும் விழித்துக் கொள்வதில்லை. சட்டம்-ஒழுங்கை பாதுகாப்பதில் திராணியற்ற அரசாக உள்ளது.இவ்வாறு அவர் தெரிவித்தார்.
