தாம்பரம்: ஒவ்வொரு குடும்பத்தின் உடல்நலத்தையும் தொடர்ந்து கண்காணித்து, நோயின் தன்மையை அறிந்து சிகிச்சை அளித்து வந்த குடும்ப மருத்துவர்களின் பங்கு தற்போது குறைந்து வருவதாக மூத்த மருத்துவர்கள் கவலை தெரிவித்துள்ளனர்.
சென்னையை அடுத்த தாம்பரத்தில் இந்திய மருத்துவ சங்கத்தின் தாம்பரம் கிளை சார்பில் 3 நாள் மருத்துவக் கண்காட்சி கடந்த 17-ம் தேதி தொடங்கியது. இதையொட்டி, ‘என் குடும்ப நல மருத்துவர்கள்’ என்ற தலைப்பில் நடைபெற்ற கருத்தரங்கில் மருத்துவர்கள் பாலசுப்ரமணியன், ராகவேலு, யசோதா, அமுதா, கருணாநிதி உள்ளிட்டோர் பங்கேற்றுப் பேசினர்.
அவர்கள் பேசியதாவது: முன்பெல்லாம் ஒவ்வொரு குடும்பத்துக்கும் ஒரு குடும்ப மருத்துவர் இருப்பார். குழந்தைகள் முதல் முதியவர்கள் வரை குடும்பத்தில் யாருக்கு உடல்நலக் குறைவு ஏற்பட்டாலும் முதலில் அந்த மருத்துவரைத்தான் அணுகுவார்கள். குடும்ப உறுப்பினர்களின் வயது, உடல்நிலை, ஏற்கெனவே இருந்த நோய்கள், மருத்துவப் பின்னணி, உணவுப் பழக்கம் உள்ளிட்ட விவரங்களை அறிந்திருப்பதால், நோயின் தன்மையை புரிந்துகொண்டு சிகிச்சை அளிப்பதில் குடும்ப மருத்துவர்கள் முக்கியப் பங்கு வகித்தனர். நோய் ஏற்பட்ட பிறகு சிகிச்சை அளிப்பது மட்டுமின்றி, நோய் வராமல் தடுப்பதற்கான ஆலோசனைகளையும் வழங்குவர்.
ஆனால், தற்போது இதயவியல், சிறுநீரகவியல், நரம்பியல், எலும்பியல், சர்க்கரை நோய் உள்ளிட்ட பல்வேறு மருத்துவ சிறப்புப் பிரிவுகள் வளர்ச்சி அடைந்துள்ளன. இதனால், உடல்நலப் பிரச்சினை ஏற்பட்டவுடன் குடும்ப மருத்துவரை அணுகுவதற்குப் பதிலாக, சம்பந்தப்பட்ட சிறப்பு மருத்துவரை நேரடியாக அணுகும் போக்கு அதிகரித்துள்ளது. இதன் காரணமாக, குடும்பத்தின் ஒட்டுமொத்த உடல்நலத்தையும் தொடர்ந்து கண்காணிக்கும் குடும்ப மருத்துவர்களின் பங்கு குறைந்து வருகிறது.
சிறப்பு மருத்துவர்களின் சேவை நோய்களைக் கண்டறிந்து உரிய சிகிச்சை அளிப்பதில் இன்றியமையாதது. அதே நேரத்தில், ஒரு நபர் பல்வேறு உடல் உபாதைகளுக்கு வேறு வேறு மருத்துவர்களிடம் சிகிச்சை பெறும்போது, அவர் எடுத்துக்கொள்ளும் மருந்துகள், முந்தைய மருத்துவப் பதிவுகள், உடல்நிலையில் ஏற்படும் மாற்றங்கள் ஆகியவற்றை ஒருங்கிணைத்துக் கண்காணிப்பதும் அவசியமாகிறது.
ஒரு குடும்பத்தின் மருத்துவப் பின்னணியை அறிந்த குடும்ப மருத்துவர் இருப்பது, நோயின் ஆரம்ப அறிகுறிகளைக் கண்டறியவும், தேவையான நேரத்தில் சிறப்பு மருத்துவர்களின் ஆலோசனையைப் பெறவும் உதவும். எனவே, சிறப்பு மருத்துவத் துறைகளின் வளர்ச்சிக்கு இணையாக குடும்ப மருத்துவ முறைக்கும் முக்கியத்துவம் அளிக்க வேண்டும். ஒவ்வொரு குடும்பமும் நம்பிக்கையான மருத்துவருடன் தொடர்ந்து தொடர்பில் இருக்கும் பழக்கத்தை மீண்டும் வளர்த்துக்கொள்ள வேண்டும். இவ்வாறு அவர்கள் வலியுறுத்தினர்.
