சென்னை: அதிமுக எம்எல்ஏக்கள் தகுதிநீக்க மனுக்கள் மீது இரு மாதங்களில் நடவடிக்கை எடுக்க பேரவைத் தலைவருக்கு உயர் நீதிமன்றம் கெடு விதித்துள்ளது.
நம்பிக்கை வாக்கெடுப்பின்போது அதிமுக கொறடா உத்தரவை மீறி சட்டப்பேரவையில் தவெக அரசுக்கு ஆதரவாக வாக்களித்ததாகக் கூறி அதிமுக எம்எல்ஏ-க்களாக பதவி வகித்த மரகதம் குமரவேல், சத்தியபாமா, ஜெயக்குமார், இசக்கி சுப்பையா, எம்.ஆர்.விஜயபாஸ்கர், சி.விஜயபாஸ்கர் ஆகிய 6 பேர் மீதும் கட்சித்தாவல் தடைச்சட்டத்தின் கீழ் தகுதிநீக்க நடவடிக்கை எடுக்கக்கோரி அதிமுக பொதுச் செயலாளர் பழனிசாமி பேரவைத் தலைவரிடம் கடிதம் அளித்தார்.
இது நிலுவையில் இருந்த நிலையில் 6 பேரது ராஜினாமா கடிதங்களை ஏற்று பேரவைத் தலைவர் உத்தரவிட்டது சட்டவிரோதம் என அறிவிக்கக்கோரி அதிமுக கொறடா அக்ரி கிருஷ்ணமூர்த்தி, தேசிய மக்கள் சக்திகட்சித் தலைவர் எம்.எல்.ரவி ஆகியோர் உயர் நீதிமன்றத்தில் வழக்குகள் தொடர்ந்திருந்தனர்.
இந்த வழக்குகளை விசாரித்த தலைமை நீதிபதி எஸ்.ஏ.தர்மாதிகாரி மற்றும் நீதிபதி ஜி.அருள்முருகன் ஆகியோர் அடங்கிய அமர்வு நேற்று பிறப்பித்துள்ள உத்தரவில் கூறியிருப்பதாவது: 6 பேரது ராஜினாமா கடிதங்களையும் பேரவைத் தலைவர் ஏற்று உத்தரவு பிறப்பித்தது சட்டவிரோதமாகாது. ராஜினாமா செய்வது அவர்களின் தனிப்பட்ட உரிமை. மாறாக சம்பந்தப்பட்ட எம்எல்ஏ சுயவிருப்பத்தின் பேரில் ராஜினாமா செய்தாரா என்பதைத் தான் பேரவைத் தலைவரால் விசாரிக்க முடியும்.
தகுதிநீக்கம் செய்யக்கோரும் மனு நிலுவையில் உள்ளதால் மட்டுமே, ராஜினாமாவை பேரவைத் தலைவர் ஏற்றது சட்டவிரோதம் எனக்கூற முடியாது. ராஜினாமா, தகுதி நீக்கம் தனித்தனி நடவடிக்கைகள். எனவே 6 பேரது ராஜினாமா கடிதங்களையும் ஏற்றது அரசியலமைப்பு சட்டரீதியாகச் செல்லும்.
கரூர் எம்.ஆர்.விஜயபாஸ்கர் மற்றும் விராலிமலை சி.விஜயபாஸ்கரை அதிமுக மன்னித்துவிட்டது. அதன்பிறகே அவர்கள் தவெகவில் இணைந்துள்ளனர்.
அவர்கள் இருவருக்கும் எதிராகஎந்தவொரு தகுதி நீக்க நடவடிக்கையும் நிலுவையில் இல்லாத சூழலில் அவர்களை தகுதி நீக்கம் கோரி தொடரப்பட்ட வழக்குகளை தள்ளுபடி செய்கிறோம். அதேநேரம் மரகதம் குமரவேல், சத்தியபாமா, ஜெயக்குமார், இசக்கி சுப்பையா ஆகியோரை தகுதி நீக்கம் செய்யக்கோரி அளிக்கப்பட்டுள்ள மனு நிலுவையில் உள்ளதால் அவர்கள் மீதான நடவடிக்கையை பேரவைத் தலைவர் இருமாதங்களில் முடிக்க வேண்டும். 4 பேரது ராஜினாமாவை பேரவைத் தலைவர் ஏற்றுக் கொண்டதன் மூலம் அவர்களுக்கு எதிரான தகுதிநீக்க நடவடிக்கை செல்லாததாகி விடாது.
கட்சித் தாவல் தடைச்சட்டத்தின் கீழ் நடைபெறும் இந்த விசாரணையை சம்பந்தப்பட்ட 4 பேரும் தாமதப்படுத்தும் நோக்கில் செயல்பட்டால் அதற்கு பேரவைத் தலைவர் அனுமதிக்கக் கூடாது. அதேபோல இரு மாதங்களில் 4 பேர் மீதான தகுதிநீக்க நடவடிக்கையின் மீது பேரவைத் தலைவர் முடிவு எடுக்காதபட்சத்தில், சம்பந்தப்பட்டவர்கள் மீண்டும் நீதிமன்றத்தை அணுகலாம். இவ்வாறு உத்தரவிட்டனர்.
மேல்முறையீடு: இந்த உத்தரவை எதிர்த்து உச்ச நீதிமன்றத்தில் மேல்முறையீடு செய்யவுள்ளதாகவும் 6 பேருமே இந்த விவகாரத்தில் தப்ப முடியாது என்றும் அதிமுக எம்பி இன்பதுரை கூறியுள்ளார்.
