ஆற்காடு: தமிழ் திரையுலகில் கானா பாடல்கள் மூலம் தனி முத்திரை பதித்த இசையமைப்பாளர் ‘தேனிசைத் தென்றல்’ தேவாவின் உடல், ராணிப்பேட்டை மாவட்டம் ஆற்காடு அருகே உள்ள சக்கரமல்லூரில் 72 குண்டுகள் முழங்க அரசு மரியாதையுடன் நேற்று அடக்கம் செய்யப்பட்டது.
இசையமைப்பாளர் தேவாவுக்கு நேற்று முன்தினம் காலை சென்னையில் உள்ள வீட்டில் திடீரென நெஞ்சுவலி ஏற்பட்டது. இதையடுத்து அவர் உடனடியாக மருத்துவமனைக்குக் கொண்டுசெல்லும் வழியிலேயே உயிரிழந்தார். அவரது மறைவு திரையுலகினர், இசைக் கலைஞர்கள், அரசியல் கட்சியினர் மற்றும் ரசிகர்களிடையே பெரும் சோகத்தை ஏற்படுத்தியது.
இதையடுத்து, அவரது உடலை சொந்த ஊரான ராணிப்பேட்டை மாவட்டம் ஆற்காடு அடுத்த சக்கரமல்லூர் ஊராட்சிக்கு உட்பட்ட அண்ணா நகரில் உள்ள கிருஷ்ணவேணி பண்ணைத் தோட்டத்தில் நல்லடக்கம் செய்வதற்கான ஏற்பாடுகள் மேற்கொள்ளப்பட்டன. சென்னையில் இருந்து சிறப்பு வாகனம் மூலம் தேவாவின் உடல், நேற்று மாலை அவரது பிறந்த ஊரான பழைய மாங்காடு கிராமத்துக்குக் மாலை 3.30 மணிக்கு கொண்டுவரப்பட்டது. அங்குப் பொதுமக்கள் அஞ்சலிக்காகச் சிறிது நேரம் வைக்கப்பட்டது.
பின்னர், மேளதாளங்கள் மற்றும் இசைக் கருவிகள் முழங்க தேவாவின் உடல் சக்கரமல்லூரில் உள்ள கிருஷ்ணவேணி பண்ணைத் தோட்டத்துக்குக் கொண்டுசெல்லப்பட்டது. அங்கு பொதுமக்கள் பார்வைக்காக வைக்கப்பட்ட அவரது உடலுக்கு உறவினர்கள், கிராம மக்கள் மற்றும் ரசிகர்கள் மாலை அணிவித்து இறுதி மரியாதை செலுத்தினர்.
250 போலீஸார் பாதுகாப்பு: தமிழக அரசு சார்பில் அரசு மரியாதையுடன் தேவாவின் உடல் நல்லடக்கம் செய்யப்படும் என அறிவிக்கப்பட்டதைத் தொடர்ந்து, மாவட்ட நிர்வாகம் சார்பில் முன்னேற்பாடுகள் செய்யப்பட்டன. நல்லடக்கம் நடைபெறும் இடம் தயார் செய்யப்பட்டு, தேவையான கட்டமைப்புப் பணிகளும் மேற்கொள்ளப்பட்டன.
தேவாவின் உடல் வைக்கப்பட்ட பண்ணை வீடு மற்றும் நல்லடக்கம் நடைபெறும் இடத்தை மாவட்ட காவல் கண்காணிப்பாளர் சிபின் பார்வையிட்டு ஆய்வு செய்தார். அங்கு சுமார் 250 போலீஸார் பாதுகாப்புப் பணியில் ஈடுபட்டனர். மேலும், பண்ணை வீட்டின் முன்பு இசைக் கலைஞர்கள் தேவாவின் இசைப் பாடல்களை வாசித்து அஞ்சலி செலுத்தினர்.
இதைத்தொடர்ந்து, 24 போலீஸார் அணிவகுத்து நின்று 72 குண்டுகள் முழங்க அரசு மரியாதை செலுத்தப்பட்டது. பின்னர், தேவாவின் உடல் மாலை 4.30 மணிக்கு நல்லடக்கம் செய்யப்பட்டது. இதில் அவரது மகன் ஸ்ரீகாந்த் தேவா மற்றும் உறவினர்கள் பங்கேற்று இறுதிச் சடங்குகளைச் செய்தனர்.
தமிழக அரசு சார்பில் அமைச்சர் காந்திராஜ், மாவட்ட ஆட்சியர் ப்ரியா ஆகியோர் மலர் வளையம் வைத்து அஞ்சலி செலுத்தினர். மேல்மருவத்தூர் ஆதிபராசக்தி கோயிலைச் சேர்ந்த அன்பழகன், பாடகி அனுராதா ராம், நடிகர் ஜெய், இயக்குநர் ராஜா, இயக்குநர் சேரன், முன்னாள் அமைச்சர்கள் ஆர்.காந்தி, கே.சி.வீரமணி, சேவூர் ராமச்சந்திரன், சட்டப்பேரவை உறுப்பினர்கள் தாஹிரா (ராணிப்பேட்டை), சுதாகர் (காட்பாடி), வினோத் கண்ணன் (வேலூர்), சுகுமார் (ஆற்காடு), முன்னாள் சட்டப்பேரவை உறுப்பினர்கள் ஈஸ்வரப்பன், பழனி உள்ளிட்டோர் அஞ்சலி செலுத்தினர். இசைக் கலைஞர்கள், பாடகர்கள், அரசியல் கட்சிப் பிரமுகர்கள் மற்றும் ஏராளமான பொதுமக்களும் பங்கேற்று இறுதி மரியாதை செலுத்தினர்.
தனது இசையால் பல தலைமுறை ரசிகர்களைக் கவர்ந்த தேவாவின் உடல், அவர் பிறந்த மண்ணிலேயே அரசு மரியாதையுடன் நல்லடக்கம் செய்யப்பட்ட நிகழ்வு, அப்பகுதி மக்களிடையே சோகத்தையும் நெகிழ்ச்சியையும் ஏற்படுத்தியது.
