சென்னை: சென்னையில் வணிக பயன்பாட்டுக்கான எல்பிஜி சிலிண்டர் விலை ரூ.11.50 உயர்ந்து, ரூ.2,994.50 ஆக அதிகரித்துள்ளது.
பொதுத்துறையைச் சேர்ந்த இந்தியன் ஆயில் நிறுவனம், பாரத் பெட்ரோலியம் நிறுவனம், ஹிந்துஸ்தான் பெட்ரோலியம் நிறுவனம் ஆகிய எண்ணெய் நிறுவனங்கள், வீடுகளுக்கு 14.2 கிலோ எடையிலும், வணிக பயன்பாட்டுக்கு ரூ.19 கிலோ எடையிலும் சமையல் காஸ் சிலிண்டர்களை விநியோகம் செய்கின்றன.
இந்நிறுவனங்கள், சர்வதேச சந்தையில் நிலவும் கச்சா எண்ணெய் விலைக்கு ஏற்ப விலையில் மாற்றம் செய்கின்றன, அந்த வகையில், நாடு முழுவதும் உள்ள முக்கிய நகரங்களில் 19 கிலோ எடைக்கொண்ட வணிக பயன்பாட்டுக்கான சிலிண்டர் விலை ரூ.10 முதல் ரூ.17 வரை உயர்ந்துள்ளது. இது வணிக சிலிண்டர் விலையில் தொடர்ந்து ஏற்படும் 3-வது மாத உயர்வு ஆகும். சென்னையில் கடந்த அக்டோபரில் வணிக பயன்பாட்டுக்கான சிலிண்டர் விலை ரூ.66.50 உயர்த்தப்பட்டிருந்தது.
சென்னையில் 19 கிலோ எடைக்கொண்ட சிலிண்டர் விலை ரூ.11.50 உயர்ந்து, ரூ.2,994.50 ஆக அதிகரித்துள்ளது. புதுடெல்லியில் ரூ.10 உயர்ந்து ரூ.2,820 ஆகவும், மும்பையில் ரூ.10.50 உயர்ந்து, ரூ.2,775 ஆகவும், கொல்கத்தாவில் ரூ.17 உயர்ந்து, 2,971 ஆகவும் நிர்ணயிக்கப்பட்டுள்ளன. இந்த விலை உயர்வு நேற்று முதல் அமலுக்கு வந்தது. வீடுகளுக்குப் பயன்படுத்தப்படும் 14.2 கிலோ வீட்டு உபயோக காஸ் சிலிண்டர் விலையில் எந்த மாற்றமும் இன்றி பழைய விலையிலேயே நீடிக்கிறது.
