புதிய பேருந்து நிலையத்தை திறந்து வைத்த முதல்வர், அங்கிருந்த மக்களுடன் செல்பி எடுத்துக் கொண்டார். படம்: ர.செல்வமுத்துகுமார்
புதுக்கோட்டை: புதுக்கோட்டையில் நேற்று நடைபெற்ற அரசு விழாவில் புதிய பேருந்து நிலையம் உள்ளிட்ட முடிவுற்ற பணிகளைத் திறந்து வைத்து, 13,676 பேருக்கு ரூ.62.73 கோடி மதிப்பில் நலத் திட்ட உதவிகள் வழங்கும் பணியை முதல்வர் விஜய் தொடங்கி வைத்தார்.
புதுக்கோட்டை ஆட்சியர் அலுவலகத்தில் நடைபெற்ற அரசு விழாவில் கலந்து கொள்ள திருச்சி விமான நிலையத்தில் இருந்து சாலை வழியாக புதுக்கோட்டைக்கு நேற்று முதல்வர் விஜய் வந்தார். வரும் வழியில் பல்வேறு இடங்களில் பொதுமக்கள் உற்சாக வரவேற்பு அளித்தனர்.
புதுக்கோட்டை கட்டியாவயல் பகுதியில் இருந்து 3 கி.மீ. தொலைவுக்கு ரோடு ஷோவாக ஆட்சியர் அலுவலகம் சென்றடைந்த முதல்வர் விஜய், அங்குள்ள கூட்டரங்கில் நடைபெற்ற விழாவில் ரூ.68.31 கோடி மதிப்பில் கட்டப்பட்ட உள்விளையாட்டு அரங்கம் உட்பட 44 முடிவுற்ற புதிய திட்டங்களைத் திறந்து வைத்தார். மேலும், ரூ.11.72 கோடி மதிப்பில் 70 புதிய பணிகளுக்கு அடிக்கல் நாட்டியதுடன், 13,676 பயனாளிகளுக்கு ரூ.62.73 கோடி மதிப்பில் நலத் திட்ட உதவிகள் வழங்கும் பணியைத் தொடங்கி வைத்தார்.
நலத் திட்ட உதவிகள் வழங்கியபோது மாற்றுத் திறனாளிகளிடம் நேரடியாகச் சென்று வழங்கியதுடன், ஒரு பெண்ணுடன் செல்ஃபி எடுத்துக் கொண்டார். பின்னர் மீண்டும் ரோடு ஷோ மூலம் புதிய பேருந்து நிலையத்துக்குச் சென்று, ரூ.23.25 கோடியில் கட்டப்பட்ட புதிய பேருந்து நிலையத்தை திறந்து வைத்து பார்வையிட்டார்.
அதைத்தொடர்ந்து, விருந்தினர் மாளிகைக்குச் சென்று ஓய்வெடுத்த அவர், மாலை 3 மணியளவில் சாலை வழியாக மீண்டும் திருச்சி விமான நிலையம் சென்று, அங்கிருந்து தனி விமானம் மூலம் சென்னை புறப்பட்டார்.
விழாவில் நீர்வளத் துறை அமைச்சர் என்.ஆனந்த், தொழிலாளர் நலத் துறை அமைச்சர் ஜெ.முகமது பர்வேஸ், எம்.பி.க்கள் துரை வைகோ, ஜோதிமணி, நவாஸ் கனி, எம்எல்ஏ என்.சுப்பிரமணியன், ஆட்சியர் எம்.அருணா உள்ளிட்டோர் பங்கேற்றனர். புதிய பேருந்து நிலையம் அருகே முதல்வரை வரவேற்பதற்காக வெயிலில் நீண்ட நேரம் காத்திருந்த 3 பேர் அடுத்தடுத்து மயங்கி விழுந்தனர். அவர்களை போலீஸாரே தூக்கிச் சென்று நிழலில் அமர வைத்தனர்.மேலும், வெயிலில் காத்திருந்த பொது மக்களுக்கு போலீஸார் குடிநீர் வழங்கினர்.
தேமுதிகவினர் சிறை வைப்பு: விலைவாசி உயர்வை தமிழக அரசு தடுக்க தவறிவிட்டதாக குற்றம்சாட்டி முதல்வருக்கு கருப்புக் கொடி காட்டத் திட்டமிட்டிருந்த தேமுதிக மாவட்டச் செயலாளர் கார்த்திகேயன், மாநகரச் செயலாளர் பரமஜோதி ஆகியோரை, அக்கட்சி அலுவலகத்திலேயே போலீஸார் காவலில் வைத்தனர். இதேபோல, முதல்வரிடம் கோரிக்கை மனு அளிப்பதற்காக ஆட்சியர் அலுவலகம் வந்திருந்த புதுக்கோட்டை தொகுதியில் தவெக சார்பில் போட்டியிட்ட கே.எம்.சரீப்பையும் போலீஸார் தடுத்து நிறுத்தினர்.
புதுக்கோட்டை பேருந்து நிலையம் அருகில் உள்ள ஆயுதப்படை மைதானத்தில் பயனாளிகளுக்கு நலத் திட்ட உதவிகள் வழங்கும் விழாவை நடத்துவது என முதலில் திட்டமிடப்பட்டது. இதற்காக அங்கு பிரம்மாண்ட பந்தல் மற்றும் 2,000 பேர் வரை அமர்வதற்கான இருக்கை வசதிகள் ஏற்படுத்தப்பட்டு வந்தன. ஆனால், பாதுகாப்பு காரணங்கள் என்பதை சுட்டிக்காட்டி அங்கு விழாவை நடத்த வேண்டாம் என உளவுத் துறையினர் கொடுத்த தகவலின் அடிப்படையில், அந்த இடம் கைவிடப்பட்டு, ஆட்சியர் அலுவலக கூட்டரங்குக்கு கடைசி நேரத்தில் விழா மாற்றப்பட்டது.
மக்கள் அவதி: பேருந்து நிலையம் கட்டுமானப் பணியின்போது, தற்காலிக பேருந்து நிலையம் செயல்பட்டது. இந்நிலையில், புதிய பேருந்து நிலையம் திறப்பு விழாவுக்கான முன்னேற்பாடு பணிக்காக வேறு இடத்துக்கு தற்காலிக பேருந்து நிலையம் மாற்றப்பட்டது. ஆனால், நேற்று திறப்பு விழா நடைபெற்றபோது வெவ்வேறு இடங்களுக்கு மாற்றப்பட்டது. இதுகுறித்து மாவட்ட நிர்வாகம் முன்னறிவிப்பு செய்யாததாலும், பேருந்து நிலையம் திறந்தவுடன் அங்கிருந்து பேருந்துகளை இயக்காததாலும் பள்ளி, கல்லூரி மாணவ, மாணவிகள், பொதுமக்கள் கடும் அவதிக்கு ஆளாகினர்.
