வேட்புமனு தாக்கல் செய்த முதல்வர் ஸ்டாலின், தவெக தலைவர் விஜய்
சென்னை: கையிருப்பாக ரூ.10 ஆயிரம் மட்டுமே ரொக்கம் இருப்பதாகவும், ரூ.6.26 கோடிக்கு அசையும், அசையா சொத்துகள் இருப்பதாகவும் வேட்புமனுவில் முதல்வர் ஸ்டாலின் தெரிவித்துள்ளார்.
தவெக தலைவர் விஜய், தனக்கு ரூ.404 கோடியில் அசையும் சொத்துகள் இருப்பதாக தெரிவித்துள்ளார். சென்னை கொளத்தூரில் போட்டியிடும் மு.க.ஸ்டாலின் நேற்று வேட்புமனு தாக்கல் செய்தார். அத்துடன் அவர் தாக்கல் செய்துள்ள பிரமாணப்பத்திரத்தில் குறிப்பிட்டுள்ள சொத்து விவரம்:
கடந்த ஆண்டு தனக்கு ரூ.30.59 லட்சமும், மனைவி துர்காவுக்கு ரூ.5.33 லட்சமும் வருமானம் கிடைத்ததாக வருமான வரி கணக்கில் தெரிவித்துள்ளார். தன்னிடம் தற்போது கையிருப்பாக ரூ.10 ஆயிரமும், மனைவி துர்காவிடம் ரூ.40 ஆயிரமும் ரொக்கம் உள்ளதாக குறிப்பிட்டுள்ளார்.
தன்னிடம் நகைகள் எதுவும் இல்லை. மனைவி துர்காவிடம் 720 கிராம் நகைகள் உள்ளன. இருவர் பெயரிலும் கார் உட்பட எந்த வாகனங்களும் இல்லை என்றும் குறிப்பிட்டுள்ளார். தனது பெயரில் ரூ.3.30 கோடி மதிப்பிலான அசையும் சொத்துகளும், மனைவி துர்கா பெயரில் ரூ.1.32 கோடி மதிப்பிலான அசையும் சொத்துகளும் என மொத்தம் ரூ.4.62 கோடிக்கு அசையும் சொத்துகள் உள்ளன.
விவசாய நிலம், குடியிருப்பு கட்டிடம் என முதல்வர் ஸ்டாலின் பெயரில், ரூ.2.96 கோடிக்கும், மனைவி துர்கா பெயரில் ரூ.2.11 கோடிக்கும் என ரூ.5.07 கோடி அசையா சொத்துகள் உள்ளன. மொத்தமாக, அசையும், அசையா சொத்துகள் என ரூ.9.69 கோடி சொத்துகள் உள்ளன. தனக்கும், தனது மனவைிக்கும் கடன்கள் இல்லை. வழக்குகள் ஏதும் இல்லை எனவும் அவர் தெரிவித்துள்ளார்.
விஜய் சொத்து மதிப்பு: பெரம்பூர் தொகுதியில் போட்டியிடும் தவெக தலைவர் விஜய் தனது வேட்புமனுவை நேற்று தாக்கல் செய்தார். அனர் தனது பிரமாண பத்திரத்தில்,கையில் ரூ.2 லட்சம் ரொக்கம் இருப்பதாகவும், மனைவியிடம் ரூ.1 லட்சம் இருப்பதாகவும் தெரிவித்துள்ளார். வங்கி சேமிப்பு கணக்குகள், வைப்பீடுகள் என மொத்தம் ரூ.404.58 கோடிக்கு அசையும் சொத்துகள் உள்ளன. கட்டிடங்கள், குடியிருப்புகள், நிலங்கள் என அசையா சொத்துகளின் மதிப்பு ரூ.115.13 கோடியாகும். குற்ற வழக்குகள் ஏதும் தன் பெயரில் இல்லை என்று குறிப்பிட்டுள்ளார்.
தனது மனைவி சங்கீதா பெயரில் ரூ.15.51 கோடியில் அசையும் சொத்துகள், ரூ.2.50 கோடி மதிப்பு அசையா சொத்துகள் இருப்பதாகவும் குறிப்பிட்டுள்ளார். 2 பிஎம்டபிள்யு, லெக்சஸ், டோயட்டோ வெல்பயர், மாருதி ஸ்விப்ட், டிவிஎஸ் எக்ஸ்எல் உள்ளிட்ட வாகனங்கள் இருக்கின்றன.
தனது பெயரில் ரூ.1.20 கோடி மதிப்பிலான 883 கிராம் தங்கம் உள்ளது. 135 காரட் வைர நகைகள் மனைவி சங்கீதா பெயரில் இருக்கிறது. கொடைக்கானலில் 2 பங்களா உள்ளது. தனது பெயரில் கடன் எதுவும் இல்லை என்று கூறியுள்ளார்.
அதேநேரத்தில், தந்தை சந்திரசேகருக்கு ரூ.3.02 கோடி, மனைவி சங்கீதாவுக்கு ரூ.12.60 கோடி, தாய் ஷோபாவுக்கு ரூ8.71 லட்சம், புஸ்ஸி ஆனந்த்துக்கு ரூ.3 கோடி கடன் வழங்கப்பட்டுள்ளதாகவும் பிரமாண பத்திரத்தில் தெரிவித்துள்ளார்.
