வடபழனி - பூந்தமல்லி வரையிலான மெட்ரோ ரயில் சேவையை, போரூர் பைபாஸ் மெட்ரோ ரயில் நிலையத்தில் பிரதமர் மோடி, முதல்வர் விஜய் ஆகியோர் கொடியசைத்துத் தொடங்கி வைத்தனர்.
சென்னை: சென்னையில் ரூ.4,900 கோடி மதிப்பிலான பூந்தமல்லி - வடபழனி மெட்ரோ ரயில் சேவையை பிரதமர் மோடி, முதல்வர் விஜய் கொடியசைத்து தொடங்கி வைத்தனர்.
தமிழகத்தில் பல்வேறு நலத்திட்டங்களை தொடங்கி வைக்க சென்னைக்கு பிரதமர் மோடி சிறப்பு விமானத்தில் நேற்று காலை 11 மணிக்கு வந்தார். விமான நிலையத்தில் ஆளுநர் அர்லேகர், முதல்வர் விஜய், மத்திய அமைச்சர் எல்.முருகன் உள்ளிட்டோர் பிரதமரை வரவேற்றனர்.
அதிமுக பொதுச் செயலாளர் பழனிசாமி, தமிழக பாஜக தலைவர் நயினார் நாகேந்திரன், பாஜக மூத்த தலைவர்கள் தமிழிசை சவுந்தரராஜன், பொன்.ராதாகிருஷ்ணன், ஹெச்.ராஜா, புதிய நீதிக்கட்சி தலைவர் ஏ.சி.சண்முகம் உட்பட பலரும் பிரதமரை வரவேற்றனர்.
பின்னர், புதிய மெட்ரோ ரயில் திட்டத்தை தொடங்கி வைப்பதற்காக போரூர் மெட்ரோ ரயில் நிலையத்துக்கு பிரதமர், காரில் சென்றார். விமான நிலையம் தொடங்கி, பரங்கிமலை ராணுவ மைதானம் வரை ‘ரோடு ஷோ’ சென்ற மோடிக்கு வழிநெடுகிலும் கலை நிகழ்ச்சிகள், மேள தாளங்களுடன் பாஜகவினர், பொதுமக்கள் உற்சாக வரவேற்பு அளித்தனர்.
போரூர் பைபாஸ் மெட்ரோ ரயில் நிலையத்தில் வடபழனி - பூந்தமல்லி மெட்ரோ ரயில் சேவையை பிரதமர் மோடி, முதல்வர் விஜய் ஆகியோர் இணைந்து நேற்று கொடியசைத்து தொடங்கி வைத்தனர். முதல்வராக விஜய் பொறுப்பேற்ற பிறகு பிரதமருடன் பங்கேற்கும் முதல் அரசு நிகழ்ச்சி இதுவாகும். ரயில் சேவையை தொடங்கி வைத்த பிறகு, டிக்கெட் கவுன்ட்டரில் யுபிஐ மூலம் பணம் செலுத்தி பிரதமர் மோடி டிக்கெட் எடுத்தார்.
தொடர்ந்து, போரூரில் இருந்து பூந்தமல்லி வரை மெட்ரோ ரயிலில் பிரதமர் மோடி, முதல்வர் விஜய் ஒன்றாகப் பயணித்து மீண்டும் போரூர் திரும்பினர். அப்போது, மெட்ரோ ரயில் திட்டம், பயணிகள் சேவை குறித்து அதிகாரிகளிடம் பிரதமர் கேட்டறிந்தார். சென்னை மெட்ரோ ரயில் திட்டத்தின் வழித்தடங்கள், எதிர்கால திட்டங்கள் குறித்து மெட்ரோ ரயில் நிலைய மேலாண்மை இயக்குநர் ஆஷிஷ் சாட்டர்ஜி, பிரதமரிடம் விளக்கிக் கூறினார்.
பூந்தமல்லி பைபாஸ் - வடபழனி வரை 15 கி.மீ. தொலைவுக்கு உயர்மட்ட மெட்ரோ ரயில் வழித்தடம் சுமார் ரூ.4,900 கோடி மதிப்பில் அமைக்கப்பட்டுள்ளது. இந்த மஞ்சள் வழித்தடத்தில் பூந்தமல்லி பைபாஸ், பூந்தமல்லி பேருந்து நிலையம், பூந்தமல்லி அரசு மருத்துவமனை, கரையான்சாவடி, குமணன்சாவடி, காட்டுப்பாக்கம், அய்யப்பன்தாங்கல், தெள்ளியாரகரம், போரூர் புறவழிச் சாலை, போரூர் சந்திப்பு, வடபழனி ஆகிய 11 மெட்ரோ ரயில் நிலையங்கள் உள்ளன. இத்தடத்தில் பயணிகள் சேவை நேற்றே தொடங்கியது. இதையடுத்து பயணிகள் நேற்று மாலை மெட்ரோ ரயிலில் உற்சாகமாக பயணித்தனர்.
