சென்னை: டாஸ்மாக் மதுபான விலை ரூ.10 உயர்த்தப்பட்டதை எதிர்த்து கேளிக்கை விடுதிகள், நட்சத்திர ஓட்டல்கள் சங்கம் சார்பில் தொடரப்பட்ட வழக்கில், தமிழக அரசு, டாஸ்மாக் நிர்வாகம் பதில் அளிக்க உயர் நீதிமன்றம் உத்தரவிட்டுள்ளது.
இதுகுறித்து எப்எல்-2, எப்எல்-3 மதுபான விற்பனை உரிமம் பெற்றுள்ள கேளிக்கை விடுதிகள் மற்றும் நட்சத்திர ஓட்டல்கள் சங்கம் சார்பில் அதன் செயலாளர் எம்.ஜெய்கணேஷ் சென்னை உயர் நீதிமன்றத்தில் தாக்கல் செய்த மனுவில் கூறியிருந்ததாவது:
உயர் நீதிமன்ற உத்தரவின் அடிப்படையில் காலி மதுபான பாட்டில்களை திரும்பப் பெறும் வகையில் மதுவிலக்கு அமலாக்கத் துறை ஆணையர் கடந்த 2022-ம் ஆண்டு ஒரு சுற்றறிக்கை பிறப்பித்தார்.
அதன்படி, ஏற்கெனவே டாஸ்மாக் கடைகளில் மதுபானங்களை விற்கும்போது ரூ.10 கூடுதலாக வசூலிக்கப்பட்டு, பாட்டிலை திருப்பி வழங்கும் போது ரூ.10 திருப்பித் தரப்பட்டது.
இந்த நிலையில், தற்போது சுற்றுச்சூழல், சமூகநல செஸ் வரியாக மதுபானங்களின் அதிகபட்ச சில்லறை விற்பனை விலையில் ரூ.10 உயர்த்தப்பட்டுள்ளது. இது சட்டவிரோதம்.
மேலும், கேளிக்கை விடுதிகளில் உறுப்பினராக உள்ளவர்கள் மதுபானங்களை வாங்கி தங்கள் வீட்டுக்கும் எடுத்துச் செல்லலாம். அவர்களது வீடுகளுக்கு தேடிச் சென்று காலி பாட்டில்களை சேகரிக்க முடியாது.
எனவே இதுதொடர்பாக மதுவிலக்கு அமலாக்கத் துறை ஆணையர் பிறப்பித்த சுற்றறிக்கையை ரத்து செய்ய வேண்டும். இவ்வாறு அதில் கூறப்பட்டுள்ளது.
இந்த வழக்கை விசாரித்த நீதிபதி என்.செந்தில்குமார் இதுதொடர்பாக தமிழக அரசு மற்றும் டாஸ்மாக் நிர்வாகம் பதில் அளிக்க உத்தரவிட்டு, விசாரணையை அடுத்த வாரத்துக்கு தள்ளிவைத்தார்.
