புதுடெல்லி: மதுராந்தகம், தாராபுரம் இடைத்தேர்தலை ரத்து செய்ய வேண்டும் அல்லது வாக்கு எண்ணிக்கையை நிறுத்தி வைக்க வேண்டும் எனக் கோரி உச்சநீதிமன்றத்தில் மேல்முறையீட்டு மனுத் தாக்கல் செய்யப்பட்டுள்ளது.
தமிழக சட்டப்பேரவைத் தேர்தலுக்குப் பிறகு, சில பேரவை உறுப்பினர்கள் தாமாக முன்வந்து தங்கள் பதவியை ராஜினாமா செய்துவிட்டு தவெகவில் இணைந்தனர், இதனால் சில தொகுதிகள் காலியானதாக அறிவிக்கப்பட்டது.
அவ்வாறு காலியானதில் மதுராந்தகம், தாராபுரம் ஆகிய இரு தொகுதிகளுக்கு அறிவிக்கப்பட்டுள்ள இடைத்தேர்தல் செலவை வேட்பாளர்கள் ஏற்கும் வகையில் உரிய நடைமுறையை வகுக்கும் படி சென்னையைச் சேர்ந்த வழக்கறிஞர் சுதன் தாக்கல் செய்த பொதுநல வழக்கை சென்னை உயர் நீதிமன்றம் தள்ளுபடி செய்து தீர்ப்பளித்திருந்தது.
இதனை எதிர்த்து உச்ச நீதிமன்றத்தில் வழக்கறிஞர் சுதன் மேல்முறையீட்டு மனுவை தாக்கல் செய்துள்ளார். அதில் கூறியிருப்பதாவது: தற்போது நடைபெறவிருக்கும் இடைத்தேர்தல் உறுப்பினர்களின் மரணம் அல்லது தகுதி நீக்கம் ஆகியவற்றால் ஏற்படவில்லை மாறாக தேர்ந்தெடுக்கப்பட்ட எம்எல்ஏக்கள் தாமாக முன்வந்து ராஜினாமா செய்ததால் தேர்தல் நடத்தும் சூழல் ஏற்பட்டு, மக்களின் வரிப்பணம் வீணடிக்கப்படுகிறது.
மேலும் இடைத் தேர்தல் நடைபெறுவதற்கு காரணமான நபர்களே தற்போது வேறு ஒரு கட்சியின் சார்பாக அந்தத் தொகுதிகளில் வேட்பாளர்களாக களம் இறங்கியுள்ளனர்.
இவ்வாறு எம்எல்ஏ பதவியை ராஜினாமா செய்துவிட்டு மீண்டும் அதே தொகுதியில் வேறு கட்சி சார்பாக போட்டியிடும் அந்த வேட்பாளர்கள் இடைத் தேர்தலுக்கான செலவை வைப்பு நிதியாகச் செலுத்த வேண்டும் அல்லது இவ்வாறு நடப்பதை தடுக்க உரிய விதிகளை வகுக்க தேர்தல் ஆணையத்துக்கு உத்தரவிட வேண்டும்.
அதுவரை மதுராந்தகம், தாராபுரம் தொகுதிகளுக்கான இடைத்தேர்தல்களுக்குத் தடை விதிக்க வேண்டும் அல்லது வாக்கு எண்ணிக்கையை நிறுத்திவைக்க வேண்டும். இவ்வாறு அந்த மனுவில் கோரிக்கை வைத்துள்ளார். இந்த மேல்முறையீட்டு மனுவை அவசரமாக விசாரணைக்கு எடுக்கக்கோரி மனுதாரர் சுதன் சார்பில் உச்ச நீதிமன்றத்தில் இன்று முறையீடு செய்ய உள்ளது குறிப்பிடத்தக்கது.
