அதிமுக வேட்பாளர் விருகை ரவியை ஆதரித்து பிரச்சாரம் செய்த பொதுச் செயலாளர் பழனிசாமி.
படங்கள்: எஸ்.சத்தியசீலன்
சென்னை: விருகம்பாக்கம் தொகுதியில் திமுக, அதிமுக, நாம் தமிழர் மற்றும் தமிழக வெற்றிக் கழகம் ஆகிய கட்சிகளிடையே நிலவும் 4 முனைப் போட்டியால் தொகுதி முழுவதும் தேர்தல் பணி விறுவிறுப்படைந்துள்ளது.
திமுக சார்பில் தற்போதைய எம்எல்ஏ பிரபாகர் ராஜா மீண்டும் களம் காண்கிறார். அதிமுக சார்பில் முன்னாள் எம்எல்ஏ விருகை ரவி, நாதக சார்பில் சந்தோஷ், தவெக சார்பில் சபரிநாதன் ஆகியோர் களத்தில் உள்ளனர்.
இவர்களுடன் அண்ணா புரட்சித் தலைவர் அம்மா திராவிட முன்னேற்றக் கழகத்தின் ராய் ஜார்ஜ், இந்திய குடியரசுக் கட்சியின் ஜெகதீஷ், நாம் இந்தியர் கட்சியின் பாலமுருகன் மற்றும் 15 சுயேச்சை வேட்பாளர்கள் போட்டியிடுகின்றனர்.
வீதி வீதியாகச் சென்று பெண்களிடம் வாக்கு சேகரித்த திமுக வேட்பாளர் பிரபாகர் ராஜா.
திமுக - ‘முன்மாதிரி தொகுதி’ முழக்கம்
திமுக வேட்பாளர் பிரபாகர் ராஜா, கடந்த 5 ஆண்டுகளில் தான் செய்த பணிகளைப் பட்டியலிட்டு ஆதரவு திரட்டி வருகிறார். குறிப்பாக, கோயம்பேடு சந்தை மற்றும் குடியிருப்பு பகுதிகளில் சூறாவளி சுற்றுப்பயணம் மேற்கொள்ளும் அவர், “விருகம்பாக்கத்தின் நீண்டகால மழைநீர் வடிகால் பிரச்சினைக்குத் தீர்வு கண்டுள்ளோம்.
மகளிர் இலவசப் பேருந்து பயணம், கலைஞர் மகளிர் உரிமைத் தொகை போன்ற திட்டங்கள் தொடரவும், விருகம்பாக்கத்தை ஒரு முன்மாதிரி தொகுதியாக மாற்றவும் தனக்கு வாக்களிக்க வேண்டும்’’ என பிரச்சாரம் செய்து வருகிறார்.
அதிமுக - ‘பொற்கால திட்டங்கள்’ கிடைக்க அழைப்பு
அதிமுக வேட்பாளர் விருகை ரவி, திமுக அரசின் மீதான விமர்சனங்களை முன்வைத்து பிரச்சாரம் செய்கிறார். “கடந்த 5 ஆண்டுகளில் தொகுதியில் எந்த வளர்ச்சிப் பணிகளும் நடைபெறவில்லை. மக்களின் அடிப்படைத் தேவைகள் புறக்கணிக்கப்பட்டுள்ளன. அதிமுக ஆட்சிக் காலத்தில் இருந்த பொற்கால திட்டங்கள் மீண்டும் கிடைக்க எனக்கு வாக்களியுங்கள்” என பிரச்சாரம் செய்து வருகிறார்.
வாக்காளர்களை தனித்தனியாக சந்தித்து வாக்கு சேகரித்த நாதக வேட்பாளர் சந்தோஷ்.
நாதக - திட்டங்கள் முன்வைப்பு
நாம் தமிழர் கட்சி வேட்பாளர் சந்தோஷ், தனது பிரச்சாரத்தில், ‘பல தலைமுறைகளாக வசிக்கும் மக்களுக்குப் பட்டா வழங்குதல், தொகுதி நிதியை வெளிப்படையாகக் கண்காணிக்க இணையதளம், கோயம்பேடு சந்தை கழிவுகளிலிருந்து பயோ-காஸ் தயாரித்தல்’ போன்ற திட்டங்களை முன்வைத்து வாக்கு சேகரித்து வருகிறார்.
இளைஞர்களுடன் சென்று வாக்கு சேகரித்த தவெக வேட்பாளர் சபரிநாதன்.
தவெக - மாற்று அரசியல் குறிக்கோள்
தமிழக வெற்றிக் கழக வேட்பாளர் சபரிநாதன், “திராவிடக்கட்சிகளுக்கு மாற்றாக, நேர்மையான மற்றும் அடிப்படை வசதிகளுக்கு முன்னுரிமை அளிக்கும் புதிய அரசியலை விருகம்பாக்கத்தில் தொடங்குவோம்” என அவர் எழுச்சியுடன் பிரச்சாரம் செய்து வருகிறார். பிரதான கட்சி வேட்பாளர்கள் 4 பேரும் வீடு வீடாகச் சென்று மக்களைச் சந்திப்பதால் தேர்தல் களம் விறுவிறுப்படைந்துள்ளது.